PiT Photography in Tamil தமிழில் புகைப்படக்கலை

ரெட் ஃப்ரேம்ஸ் புகைப்படப் போட்டி முடிவுகள் - டாப் 50 படங்களுடன் பெங்களூரில் கண்காட்சி

2012-02-15T13:17:00.003+05:30

ரெட் ஃப்ரேம்ஸ் நடத்திய 'என் நகரின் காட்சிகள்'[Frames of My City] புகைப்படப்போட்டி 2011-ன் அறிவிப்பை சென்ற செப்டம்பர் மாதம் PiT-ல் பகிர்ந்து கொண்டிருந்தோம். இப்போது அதன் முடிவுகளை அறியவும், வென்ற அசத்தலான படங்களைக் காணவும் ஆவலாக இருப்பீர்கள்தானே?

வாங்க போய் பார்க்கலாம் இங்கே:

இறுதிச் சுற்றில் வெற்றி பெற்றவர்கள் : http://redframes.in/contest/contest-final-winner.aspx

வாராந்திரப் போட்டியில் பரிசைத் தட்டிச் சென்ற 7 பேர்கள் : http://redframes.in/contest/contest-winner.aspx

இவற்றையும் உள்ளடக்கிய டாப் 50 படங்களைப் பெரிய அளவில் நேரிலே கண்டு ரசிக்க ஆசையா? ஸ்டூடியோ கேலரி, 1 சாந்திரோடு, பெங்களூரில் பிப்ரவரி 18, 19 தேதிகளில் கண்காட்சி நடைபெற உள்ளது. வார இறுதிதானே. முடிந்தவர்கள் சென்று வாருங்கள்:)!

***

கடைவீதியில் ஓர் கண்ணாடிப்பேழை - 'ஒளி' பாடத்திற்கு ஒரு போட்டி

2012-02-10T16:30:00.010+05:30

ஆரம்பத்திலேயே சொல்லி விடுகிறோம். இது வழக்கமான மாதாந்திரப் போட்டி அல்ல. ஒரு காட்சியை விளக்கக் கோரும் சவால் போட்டி.

ஒளி குறித்த தகவல்களைத் தொடர் கட்டுரையாக வழங்கி வரும் திவாஜி அடுத்து வரவிருக்கும் காரமுந்திரி-பாகம் 9-ல் சொல்கிறார்:

“உதாரணமா கடைத்தெருவுக்கு போறோம். கண்ணாடி ஷோ கேஸ்ல அழகழகா பல விஷயங்கள் இருக்கு. அதெல்லாம் பார்க்கிறோம். ஆமா, பாக்கிறோமா? தங்கமணி பாக்கிறாங்க. அவங்களுக்கு அதுல சுவாரசியம் இருக்கு. பக்கத்திலேயே இருக்கிற ரங்கமணி என்ன பார்க்கிறார்? அந்த கண்ணாடியில பிரதிபலிக்கிற காலேஜ் பொண்ணை பாக்கிறார். அவர் அப்படி பாக்கிறது தங்கமணிக்கு தெரியறதில்லை. சாதாரணமா இந்த பிரதிபலிப்பு உள்ளே இருக்கிற பொருட்களைவிட நல்லாவே தெரிஞ்சுகிட்டு இருக்கும். அது ஒரு போட்டோவா இந்த காட்சியை பிடிச்சாத்தான் தெரியும்.”

கட்டுரையில் இக் காட்சியை விளக்க உதாரணப் படம் தேவைப்படுகிறது. அதை வழங்கப் போவது நீங்களே. “பிட் குடும்பத்தில் திறமைசாலிகள் பலர் இருக்கையில் எதற்கு இணையத்திலிருந்து மாதிரிப்படம் எடுக்க வேண்டும்? இதை ஒரு போட்டியாக அறிவிக்கலாமே” என்றார் திவாஜி.

அவர் சொல்வதும் சரிதானே? கேமராவுடன் கிளம்புங்கள் கடைவீதிக்கு அல்லது கடைவீதிக்குச் செல்லும் போதெல்லாம் எடுத்துக் கொள்ளுங்கள் கேமராவை:)!

ரங்கமணி தங்கமணிதான் படத்தில் இடம்பெற வேண்டுமென்பதில்லை. காட்சி அமைப்பை உள்வாங்கி எந்தக் கதாபாத்திரங்களை வைத்து வேண்டுமானாலும், எந்த சூழலைப் பின்னணியாகக் கொண்டும் எடுக்கலாம். ஏனெனில் காலேஜ் பொண்ணை மாடல் செய்யக் கேட்டு தர்ம அடி வாங்கத் தான் தயாராக இல்லை என அங்கலாய்த்தார் பிட் குழும உறுப்பினர்களில் ஒருவர்:)!

காட்சியை உள்வாங்க சில உதாரணப் படங்கள்:
மாதிரிக்காக தந்திருக்கிறோம் என்றாலும் வெளிக்காட்சியின் பிரதிபலிப்பு இப்படத்தில் அதிக அளவில் இல்லை.

கண்ணாடிக்கு உள் இருக்கும் காட்சி, பிரதிபலிப்பு இரண்டுக்கும் முக்கியத்துவம் கொடுக்கப்பட்டவையாக போட்டிப் படங்கள் இருக்க வேண்டும். சரியான உதாரணம் கீழ் வருவது: கற்பனைக்கு ஏது எல்லை? மூக்குக் கண்ணாடியில் கூட சிக்கலாம் போட்டிக்கான காட்சி:)!

சிறந்த படம் கட்டுரையில் இடம் பெறும். அதை எடுத்த அனுபவத்தை முதல் பரிசு பெற்றவர் விருப்பமானால் வாசகர்களுடன் பகிர்ந்து கொள்ளலாம். அப்பகிர்வு தனிப்பதிவாக PiT தளத்தில் வெளியிடப்பட்டுக் கெளரவிக்கப்படும். இரண்டாம், மூன்றாம் இடங்களுக்குத் தேர்வாகின்ற படங்கள் இன்னொரு பதிவாக வெளியாகும்.

படங்களை photos.in.tamil@gmail.com எனும் முகவரிக்கு அனுப்பி விட்டு இப்பதிவின் பின்னூட்டத்திலும் தெரிவித்திடுங்கள். இவை தனி பிகாஸா ஆல்பத்தில் ஏற்றப்பட மாட்டா. மாறாக நடுவராக செயலாற்றவிருக்கும் திவாஜி அவர்களுக்கு படங்கள் அனுப்பப்படும்.

முடிவு தேதி 5 மார்ச் 2012.
***

படம் 1, நன்றி National Geographic Photography Contest Winners 2011 from http://www.boston.com/

படம் 2, நன்றி Wikipedia: Window reflection of Barack Obama in the Oval Office.jpg

பிப்ரவரி 2012 - போட்டி அறிவிப்பு

2012-02-02T12:06:00.004+05:30

சௌக்கியமா நண்பர்களே? பிப்ரவரி மாத போட்டிக்கு ரெடிதானே?போட்டிக்கு வரும் படங்களை பார்ப்தில் இருக்கும் சுவாரஸ்யத்தை போலவே, ஒவ்வொரு மாதமும் போட்டிக்கு என்ன தலைப்பு வைக்கலாம்னு ஆராய்வதில் இருக்கு.

கிட்டத்தட்ட, எல்லா மாதிரியான தலைப்பையும் பிட்டில் அரங்கேற்றியாச்சு.

ஒரு ஆல்பத்தில் படங்களைப் பார்க்கும்போது, ஒவ்வொரு விதமான படமும் ஒவ்வொரு விதமான ரசனையை வெளிப்படுத்தும். Landscape மாதிரியான படங்களைப் பார்க்குமபோது, படத்தில் பல விதமான விஷயங்கள் பொதிந்து இருக்கும். நிறங்களும், வெளிச்சத்தின் அழகும், காடு மலைகளும், காண்பதற்க்கு ரம்யமாகவே இருக்கும். ஆனா, பார்வையாளன், உன்னிப்பாய் ஆராய படத்தில் ப்ரத்யேகமாய் ஒன்றும் இருக்காது. பார்வையாளனுக்கும், படத்துக்கும் ஒரு கனெக்‌ஷன் இருக்காது. பொத்தாம் பொதுவா மேலோட்டமா பாத்துட்டு உச்சு கொட்டிட்டு அடுத்த படத்துக்கு போயிருவான்.

அதுவே, புகைப்படம் ஏதாவது ஒரு சப்ஜெக்ட்டை அருகாமையில் சென்று, அந்த சப்ஜெக்ட்டின் நுணுக்கங்களைக் காட்டினால், பார்வையாளனுக்கு படத்தின் மேல் ஒரு ஈர்ப்பு ஏற்படும்.

குழந்தையின் முகமோ, கைகளோ, பூக்களின் மேலிருக்கும் வண்டோ, பறவையின் கூரிய பார்வையோ, பெண்களின் புருவமோ, மீசைக்காரரின் வசீகரச் சிரிப்போ, பாட்டியின் சுருங்கிய விரல்களோ, மீனோ, மானோ, பளீர் தக்காளியோ, சில்லென்ற கோக் பாட்டிலோ, ஃபுல் மீல்ஸோ, எதுவாக இருந்தாலும், அருகாமையில் சென்று அதன் விவரங்களைப் பதிந்தால், அந்தப் புகைப்படத்துக்கு ஒரு ஸ்பெஷல் கவனிப்பு இருக்கும்.

புரிஞ்சுடுச்சு இல்ல?

பிப்ரவரிக்கான தலைப்பு - அண்மைக் காட்சி (Close-Up)
(இயன்றவரை 'மேக்ரோ'வைத் தவிருங்கள்)

விதிமுறைகள் இங்கே

கடைசித் தேதி: பிப்ரவரி 20.

ஜமாய்ங்க!

சில மாதிரிகள்:
Surveysan

Anton:

Nathas:

surveysan

Ramalakshmi:

Anton:

Ramalakshmi:

Jeeves:

2012 ஜனவரி போட்டி முடிவுகள் - கொண்டாட்டம்

2012-01-31T07:26:00.008+05:30

அன்பான வணக்கங்கள்,

முதல் சுற்றில் வெற்றி பெற்ற டாப் 10 படங்களைப் பாத்திருப்பீங்க. போட்டியிட்டு முதல் சுற்றில் வெளியேறிய படங்களையும் அதற்காக காரணங்களையும் போட்டி ஆல்பத்திலேயே சுருக்கமாகத் தெரிவித்திருந்தேன்.

முதல் மூன்று இடங்களை பிடித்தவர்கள் யார் என்று பார்ப்பதற்கு முன், இறுதி சுற்றில் வெளியேறிய படங்களை பற்றி பார்ப்போம்.(எழுமாற்றாக வரிசைப்படுத்தப்பட்டுள்ளன)

# Raja

Backgroundஇல் தெரியும் நபர் படத்திற்கு பெரிய பலவீனம். கருப்பொருளிலிருந்து கவனத்தை திசை திருப்புகிறது. கீழ்பாகத்தின் தெரியும் கட்டையை தவிர்த்து க்ராப் (crop) செய்திருக்கலாம்.

# Chikamani

நல்ல முயற்சி. பாவிக்கப்பட்ட கோணம் நன்றாகவுள்ளது. ஆனாலும் பின்னே தெரியும் பொருட்கள்/காட்சிகள் அழகைக் கெடுக்கின்றன. சீரான அல்லது வெறுமையான பின்புற காட்சி இதை அழகுபடுத்தியிருக்கும்.

# Raghavendra

Silhouetteஇல் ஓர் நல்ல முயற்சி. பின்னே தெரியும் மனிதர்கள் பிராதான கருப்பொருளுக்கு பலவீனமாக உள்ளார்கள். பிரதான காட்சி படத்தின் நடுவே வந்திருக்க வேண்டும்.

# Varun

பாதி மங்கலாகவும் பாதி தெளிவாகவும் இருப்பது சிறப்பு. இதைவிட குறிப்பிட்டு சொல்லும்படியான காட்சிகள் இல்லாதது கவனயீர்ப்பின்றி காணப்படுகின்றது.

# தாமோதர் சந்துரு

டைட் க்ராப்பில் கை, கால் பகுதிகள் காணாமல் போனது பலவீனம். பையன் காமிராவைப் பார்ப்பது செயற்கைத் தன்மையான தோற்றத்தை ஏற்படுத்துகிறது.

# Sudhan

வயதானாலும் ஊஞ்சலாடி கொண்டாடுவது மற்றும் பிரியாத அன்பு, உறவு என்பன படத்தை 10க்குள் கொண்டு வந்துவிட்டது. ஆனாலும் படத்தில் சொல்லும்படியான கவனயீர்ப்பு இல்லை. பின்புறம் மங்கலாக இருந்திருந்தால் நன்றாக வந்திருக்கும்.

# Sathish

படத்தைப் பார்த்ததுமே விளையாட்டில் வெற்றி பெற்ற கொண்டாட்டம் தெரிகிறது. படத்திற்கு புறப்பக்கம் காட்டிய இளைஞர், முற்றிலும் கொண்டாட்டத்தில் ஈடுபடாதவர்கள் என்பன குறைபாடுகள்.

மூன்றாம் இடம்!

# Riyas

கீழ் மற்றும் மேல் பக்கத்தில் இடம் விடப்பட்டிருக்க வேண்டும். டைட் க்ராப் படத்தின் முழு அழகையும் கெடுத்துவிட்டது. கீழ்ப்பக்கம் சமச்சீர் இன்றி காணப்படுவதும் பலவீனம்.

இரண்டாம் இடம்!!

# Arun

எல்லாமே நன்றாக இருக்கிறது. கொண்டாட்டம் எங்கிருந்து வந்தது என்பதை இப்படம் சொல்லத் தவறுவதால் இரண்டாமிடம்!

முதலிடம்!!!

# Kingsly Xavier

எல்லாமே கொண்டாட்டமாக (நன்றாக) இருக்கிறது. ஆகவே முதலிடம்!

இப்போட்டியில் பங்கு பெற்ற அனைவருக்கும் எனது மனமார்ந்த நன்றி...! வெற்றி பெற்றவர்களுக்கு மனமார்ந்த வாழ்த்துக்கள்...!

அடுத்த மாத போட்டிக்குத் தயாராகுங்கள்...!

பார்த்ததில் + படித்ததில் பிடித்தது, என்னுடைய ரசனையில்:

அன்புடன்
அன்டன்

போஸ் கொடுப்பது எப்படி?

2012-01-30T12:09:00.000+05:30

PiTல், கடந்த சில வருடங்களில், காமெரா வாங்குவதிலிருந்து, ஒரு காட்சியை கட்டம் கட்டி சரியாக க்ளிக்குவது, க்ளிக்கிய படத்தை பிற்சேர்க்கையில் சரி செய்வது என சகல வித்தைகளையும் கற்று வருகிறோம்.

இன்னும் கற்றுத் தேரவும், பகிரவும், நிறைய விஷயங்கள் இருந்து கொண்டே இருக்கும். கலை சம்பந்தப்பட்ட விஷயம் எதுவா இருந்தாலும் இப்படித்தான். முடிவே இல்லாம தொடர்ந்துகிட்டே இருக்கும். கற்க கற்க நம் திறமை மேம்படும்.
ஸோ, கற்போம், கலக்குவோம்.

இவ்வளவு வருஷம் கடந்தும், நான் இன்னும் இந்தத் துறையில் கத்துக் குட்டிதான். ஆயிரமாயிரம் படங்கள் எடுத்திருந்தாலும், இன்னமும் கூட, ஒரு காட்சியை ஒரே க்ளிக்கில் பதிந்துவிட முடிவதில்லை. அஞ்சு பத்து தடவை ஒரு காட்சியை வேறு வேறு அளவுகளில் எடுத்தால்தான் அதிலிருந்து ஒன்றை ஓரளவுக்கு தேற்ற முடிகிறது.

ஒவ்வொரு புகைப்படுமும், உலகில் வேறு எந்த ஒரு புகைப்படத்திலும் இல்லாத ஒரு தனித் தன்மையை தன்னுள் கொண்டுள்ளது. அந்த நொடியில், அந்த வெளிச்சத்தில், அந்த கோணத்தில், அந்த அள்வுக் கோல்களில், அந்தக் காட்சியை, வேறு எந்த புகைப்படமும் எடுத்ததுமில்லை, இனி எடுக்கப் போவதுமில்லை.
இப்படி ஒரு தனித்தன்மை வாய்ந்த ஒரு நிகழ்வை காலம் கடந்தும் மற்றவர்கள் காணும் வாய்ப்பை உங்களின் ஒரு க்ளிக் அளிக்கிறது என்பதை நினைவில் கொள்ளுங்கள். Click, responsibly :)

கொசுவத்தி போதும், இனி தலைப்புக்கு வாரேன்.

இது நாள் வரையில், காமெராவுக்கு பின்னால் நின்று இயக்க என்னென்ன செய்யணும்னு பாத்துட்டு வந்தோம், இன்னிக்கு, காமெராவுக்கு முன் நீங்கள் இருந்தால், அந்தக் காட்சியை எப்படிக் கையாளணும்னு பாப்போம்.

என் நட்பு வட்டத்தில் ஒரு பாலாஜி இருக்கான். இருபது பேர் ஒரு படத்தில் கூட்டமாய் இருந்தாலும், அவன் மட்டும் தனியாய் தெரிவான். காரணம், சிரித்த முகத்துடன் புததுணர்ச்சி பீய்ச்சும் அவன் முகம். எல்லாரும் சிரிச்சா படத்தில் நல்லாத்தான் பதிவோம், ஆனா, நம்மில் சிலர் செய்யும் தவறு, ஓவராய்ச் சிரித்தல். படத்துக்கு போஸ் கொடுக்கும்போது, அழகாச் சிரிங்க, ஆனா செயற்கைத் தனம் இல்லாம, எப்பவும் சிரிக்கரமாதிரி அளவா அழகாச் சிரிங்க.

பாலாஜி அப்படின்னா, மகேஷ்'னு ஒருத்தன் இருக்கான். இவன் வேர மாதிரி. இவனுக்கு, புகைப்படத்துக்கு போஸ் கொடுப்பது பிடிக்காது. படம் நிறைய எடுத்தா ஆயுசு கொரஞ்சிரும்னு நம்பர கோஷ்ட்டி. ஒருத்தர் உங்களை படம் பிடிக்க ரெடியாயிட்டாருன்னா, சில நேரங்களில் தப்பிக்க வழி இருக்காது. அந்த மாதிரி நேரங்களில், கப்பல் கவிழ்ந்தது போல் முகத்தை வைத்துக் கொள்ளாமல், மனசை லேசாக்கி, கொஞ்சமாவது முகத்தில் ஒரு மலர்ச்சியைக் காட்டிடுங்க. நீங்கள் இருக்கும் படம், பல வருஷங்க்களுக்கு, பல நபர்களால் பார்வையிடப்படும் என்பதை நினைவில் கொள்ளுங்கள்.

மகேஷு அப்படின்னா, வெங்கின்னு ஒருத்தன் இருக்கான். அவன் படத்துக்கு போஸ் கொடுக்கும்போது சிரிப்பான். ஆனா, ஷட்டரை அமுக்கரதுக்குள்ள, அட்டென்ஷன் போஸ்ல வெரப்பா நிப்பான். ஃபோட்டோவுல மத்தவனெல்லாம் ரிலாக்ஸ்டா இருக்கும்போது, இவன் மட்டும் விரைப்பா நிப்பான். எப்பவுமே, காமெராவுக்கு நேரா கட்ட்டம் மாதிரி நிக்காம, கொஞ்சம் அந்தப் பக்கமோ, இந்தப் பக்கமோ திரும்பி நின்னு, ஒரு மாடல் கணக்கா போஸ் கொடுக்க முயற்சி செய்யுங்க, நச்சுனு இருக்கும்.

உங்க முக அமைப்பு உங்களுக்கே தெரியும். வட்ட முகமா? நீட்டு முகமா? சீரான முகமா? மூக்கு ஷார்ப்பா? நெத்தி பெருசா? உங்க முகத்தை எந்தக் கோணத்திலிருந்து ப்டம் புடிச்சா, அழகா தெரியும்னு காமெரா காரனை விட உங்களுக்குத் தான் தெரியும். ஷட்டரை திறக்கும் முன், சடால்னு திரும்பி, 'பக்கா'வான கோணத்தில் முக அமைப்பை காமெராவுக்கு காட்டுங்கள். அழகாய்த் தெரிவீர்கள்.

சமீபத்தில் நடந்த ஒரு ஆய்வில் என்ன கண்டுபிடிச்சிருக்காங்க தெரியுமா? ஆண்கள் புகைப்படத்துக்கு போஸ் கொடுக்கும்போது, தலையை சற்று பின்னாக நகர்த்தி தூக்கி, காமெராவுக்கு சற்று மேலாக பார்த்தாலும், பெண்கள் சற்று முன் பக்கமாக தலையை நகர்த்திப் பார்த்திருந்தாலும், ஃபோட்டோ டாப்பாக வருமாம்.

வேறென்ன? போஸ் கொடுத்து ஜமாய்ச்சிடுவீங்கல்ல இனி?

source: http://lifehacker.com/5879115/how-to-look-your-best-in-photos

pic: vino.b

பிட்டில் பிட்டு

2012-01-26T03:55:00.000+05:30

பிட்டில் பிட்டுஇதை அச்செடுத்து உங்கள் கேமரா பையில் வைத்துக் கொள்ளுங்கள்.

2012 ஜனவரி போட்டி - முதல் சுற்றுக்கு முன்னேறிய பத்து

2012-01-25T23:09:00.004+05:30

வணக்கம் நண்பர்களே!

கொண்டாட்டம் + விடுமுறை = PiT போட்டிக்கும் விடுமுறை...

இந்தக் கணக்குத்தான் போட்டிக்கு வந்திருந்த படங்களின் எண்ணிக்கை ஞாபகப்படுத்தியது. எனக்கும் வேலை சுலபமாச்சு. ஆகவே, நேரா டாப் 10க்கு போகலாம்.

இதோ முதல் சுற்றுக்கு முன்னேறிய பத்து படங்கள் (எழுமாற்றாக வரிசைப்படுத்தப்பட்டுள்ளன).

# Raja

# Arun

# Chikamani

# Riyas

# Raghavendra

# Sathish

# தாமோதர் சந்துரு

# Sudhan

# Kingsly Xavier

# Varun

தெரிவு செய்யப்படாத படங்களுக்கான என்னுடைய கருத்துக்கள் மிக விரைவில் போட்டிக்கான ஆல்பத்திலேயே தெரிவிக்கப்படும்.

அன்புடன்
அன்டன்

2012 ஜனவரி மாத போட்டி அறிவிப்பு - கொண்டாட்டம்

2012-01-03T00:58:00.004+05:30

அன்பின் நண்பர்களுக்கு PiT குழுமத்தின் புத்தாண்டு வாழ்த்துக்கள்!

நத்தார், புத்தாண்டு, போகி, பொங்கல்...... ஒரே கொண்டாட்டம்!

நானும் என் பாட்டுக்கு கொண்டாட்டம் வைக்க முடிவு பண்ணிட்டன். அதாங்க இம்மாத தலைப்பு "கொண்டாட்டம்"

தலைப்பு பார்த்ததும் உங்களுக்கு கொண்டாட்டமோ என்னமோ எனக்கு சாம்பிள் படங்கள் தேடியே திண்டாட்டமாச்சு. அதவிட கொடும, கொண்டாட்டம்னா என்ன எங்கிறதுக்கு விளக்கம் தேடுறதிலேயே போச்சு. ஒரு வெப் சைட்டுல இப்பிடி எழுதியிருந்தாங்க...

நான்கு நண்பர்கள்
தெரு மூலையில
நான்கு பியர் போத்தல்களுடன்
கொண்டாட்டம்

அதே வெப் சைட் இன்னும் ஒருபடி மேல போய் இப்படி விளக்கம் கொடுத்திருந்தாங்க...

உங்க பிறந்தநாள நூறு பேரோடும்
பண்டிகைய ஆயிரம் பேரோடும்
கல்யாணத்த லட்சம் பேரோடும் கொண்டாடலாம்
ஆனா உங்களுக்கு பிடிச்சவங்களோட கொண்டாடுறதுதான்
கொண்டாட்டம்

இதெல்லாம் கொண்டாட்டமோ இல்லையோ, அது ஆளாளுக்கு வேறுபடும். ஆனா நான் சொல்லுற கொண்டாட்டம் முக்கியமான பண்டிகைகள், மகிழ்ச்சியான விழாக்கள், வாழ்க்கையில் முக்கியமான மகிழ்ச்சியை வெளிப்படுத்தும் சந்தர்ப்பங்கள் என்பனவற்றை வெளிப்படுத்த வேண்டும். படத்த பார்க்கும்போதே நாமளும் கொண்டாடுற மாதிரி ஃபீலிங் வரவேணும்.

சாம்பிளுக்கு இதோ சில படங்கள்....

# ஜீவ்ஸ் - வேலை கிடைத்த கொண்டாட்டம்

# Naufal - புத்தாண்டு கொண்டாட்டம்

# ராமலக்ஷ்மி - நெருப்பு விழா கொண்டாட்டம்

# கருவாயன் - பாடசாலை விடுமுறைக் கொண்டாட்டம்

# கல்யாணம் கட்டப்போறமே எங்கிற கொண்டாட்டம்

போட்டிக்கான விதிமுறைகள் இங்கே

பொங்கல், போகி கொண்டாட்டங்களை மனதில் கொண்டு படம் வந்து சேர வேண்டிய கடைசி தேதியினை நீட்டித்திருக்கிறோம்: 20-01-2012

அன்புடன்
அன்டன்

2011 டிசம்பர் போட்டி- 'உன்னைப் போல் ஒருவன்' - வெற்றியாளர்கள்

2011-12-30T19:33:00.007+05:30

வெற்றி முத்திரை பெறும் படங்களைப் பற்றிப் பார்க்கும் முன் வெளியேறும் ஒரு சிலபடங்களைப் பற்றிப் பார்க்கலாம்.

# ராஜசேகரன்,
பச்சை நீரின் பின்னணியில் தட்டான்களைத் தெளிவாகப் படமாக்கியிருக்கிறீர்கள்.
ஆனால் டைட்டான க்ராபிங். கீழ் நோக்கி நகரும் தட்டானுக்கு இன்னும் சற்று இடம் கொடுத்திருந்தால் பிரமாதமாக வந்திருக்கும்.

# சூர்யா,
பச்சை இலைகளில் பளிச் சிகப்பு வண்டுகள். அருமை.
ஆனால் நீங்கள் கொஞ்சமே கொஞ்சம் சாச்சுரேஷன் கூட்டினீர்களா தெரியவில்லை. எப்போதுமே சிகப்பு இருக்கும் படங்களில் வண்ணங்களில் கைவைக்காமல் இருப்பது நல்லது. சிகப்பு லேசாக அதிகரித்தாலும் அப்பகுதியின் டீடெயில்ஸ் குறைந்து விடும். ஒருவேளை நீங்கள் எந்த அட்ஜஸ்ட்மெண்டும் செய்யவில்லையெனில், மன்னிக்க. என் பார்வைக்கு சிகப்பு அதிகப்படியாகத் தெரிகிறது.

# கடலை மிட்டாய்,
நல்ல முயற்சியாயினும் படத்தில் இரைச்சல் அதிகம்.

ஏனைய பிறரின் படங்களில் பெரிய குறைகள் இல்லையெனினும் அவற்றை விட கீழ்வரும் படங்கள் சிறப்பாக இருந்தபடியால் அவை விலகுகின்றன.

சிறப்புக்கவனம் பெறும் படங்கள்:

# ஜகன்,
அருமையான படம். கதவுக் கம்பிகள் மட்டுமின்றி சொட்டும் மழைத்துளியும் ஒன்றைப் போல் ஒன்றாக.

# கீழைராஸா,
இரட்டையர்களை வைத்துத் தலைப்புக்கு பொருத்தமாக எடுத்திருக்கிறீர்கள். அதையும் யோகாசன போஸில் கருப்பு வெள்ளையில் ப்ரசெண்ட் செய்திருக்கும் விதம் அருமை.

இருவருக்கும் வாழ்த்துகள்!

படங்களுக்குள் உங்கள் பெயர்களைப் போட்டிருப்பது மட்டும் உறுத்தல். எந்தப் போட்டிக்கானாலும் சரி, படங்களைக் கொடுக்கும் போது பெயர்களை ஓரமாகவோ அல்லது பார்டரிலோ இருக்குமாறோ பார்த்துக் கொள்வது நல்லது. இது அனைவருக்குமான ஒரு குறிப்பு.

சிறப்புக் கவனத்துடன் சிறப்புப் பாராட்டையும் பெறுகிற படம்:

# மெர்வின் ஆன்டோ
ஸ்லோ ஷட்டர் ஸ்பீடில் இரட்டையராகத் தோன்றும் படத்தை நீங்களே எடுத்திருக்கிறீர்கள். ஒரே பிரேமில் குறிப்பிட்ட நொடிகளுக்குள் எடுக்கபட்டதென பிகாஸா ஆல்பத்தில் தெரிவித்தும் இருக்கிறீர்கள். இப்படியும் படங்கள் எடுக்கலாம் எனக் காட்டிய விதத்தில் அசத்தியிருக்கிறீர்கள்.
இருப்பினும் இடப்பக்கமிருக்கும் உங்கள் மேல் வெளிச்சம் மிக அதிகமாகி விட்டதால் முதல் மூன்றுக்குள் செல்லும் வாய்ப்பு தவறுகிறது.

நல்ல முயற்சிக்குப் பாராட்டுகள்!

படத்தை எடுத்த விதத்தை இயலுமானால் கெஸ்ட் போஸ்டாக இங்கு பகிர்ந்து கொள்ளும்படி PiT கேட்டுக் கொள்ளுகிறது.

மூன்றாமிடம்:

# ஒளித்தச்சன்
அருமையான படம். பறக்கும் பறவைகளை நேர்த்தியாக, தெளிவாகப் படமாக்குவது அத்தனை எளிதல்ல. ஒன்றைப் போலவே ஒன்று. அதிலும் ஒன்றின் இறக்கைகள் மேல்நோக்கியும் ஒன்றின் இறக்கைகள் கீழ்நோக்கியுமாக பிரமாதமான டைமிங்கில் அமைந்து போன படம். மூன்றாம் இடத்துக்கான வெற்றி முத்திரையை பெறுகிறது இப்படம்:

இரண்டாம் இடம்:

# குசும்பன்,
அழகான லைட்டிங். காட்சி அமைப்புக்கு எடுத்துக் கொண்ட சிரமங்கள் ஒரு விளம்பரப் படத்தின் நேர்த்தியைப் பலனாகக் கொடுத்திருக்கிறது. வெற்றி முத்திரையை அழுத்தமாகப் பதித்தாயிற்று.

முதலாமிடம்:

# இளங்குமரன்,
சிறப்பான லைட்டிங்கும், இரண்டு முகமூடிகளையும் நிற்க வைத்து எடுத்திருக்கும் விதமும் க்ளாஸ்!!
வெற்றியாளர்களுக்கும், சிறப்புக்கவனம் பெற்றவர்களுக்கும் வாழ்த்துகள்!

தேர்வு தனிப்பட்ட ரசனையில் அமைந்தவை. முதல் சுற்றுக்குத் தேர்வு செய்யவே சிரமமாக இருக்கும் வகையில் நல்ல நல்ல படங்களைத் தந்திருந்தனர் பலரும். உற்சாகமாகக் கலந்து கொண்ட உங்கள் அத்தனை பேருக்கும் நன்றி. அடுத்த போட்டிக்கான அறிவிப்புடன் 2012-ல் சந்திக்கிறோம்.

வாசக நண்பர்களுக்கு PiT-ன் இனிய புத்தாண்டு வாழ்த்துகள்!

துகளா அலையா இரண்டுமா - ஒளி - காரமுந்திரி VIII

2011-12-27T20:43:00.002+05:30

போலரைஸ்ட் டிரக்ட் ரிப்லக்ஷன் வெளிச்சம்..

இதுல எப்பவுமே படம் பொருளை விட வெளிச்சம் கம்மியாத்தான் வரும். ஏன்னு புரிய போலரைஸ்ட் வெளிச்சம் பத்தி புரியணும்.

ஒளி துகளா இல்லை அலையான்னு பெரிய சர்ச்சை பல நாட்கள் இருந்தது. அப்புறம் அது ரெண்டுமாவும் இருக்கும்ன்னு ஒத்துகிட்டாங்க! எந்த அலை போகும் திசைக்கு செங்குத்தா அதிருமோ அது போலரைஸ் ஆகும்.

ஒலி அப்படி இல்லை, அது போகும் திசையிலேதான் அதிருது. அதனால அது போலரைஸ் ஆகாது!

மேலே இது பத்தி படிக்கிற ஆர்வம் இருந்தா இங்கே போய் படிக்கலாம்: http://en.wikipedia.org/wiki/Polarised_light#Photography

ரெண்டு பசங்க ஒரு கயிறை வெச்சுச்கொண்டு விளையாடறாங்க. ஒரு பையன் கயித்தை சும்மா பிடிச்சுகிட்டு இருக்கான். இன்னொருவன் அதை சுழற்றிக்கிட்டே இருக்கான்.
கயிறு சுருள் சுருளா இருக்கிறதை பார்க்கலாம். இப்ப இவங்க நடுவில ஒரு கேட் இருக்கு. கேட்ல செங்குத்தா சட்டங்கள் இருக்கு. என்ன ஆகும்? கயிறு பக்க வாட்டிலே ஆடுறது கேட்டை தாண்டி நின்னுடும். மேலே கீழே மட்டும் கயிறு போய் வரும். குறுக்கு சட்டங்களும் இருந்தா? மேலே கீழே ஆடுவதும் நின்னுடும்.

இதே போல போலரைஸ்ட் வெளிச்சமும்.

முதல்ல போலரைஸ்ட் பில்டர் பத்தி பார்க்கலாம். ஒரு பில்டர் வழியா ஒரு பொருளை பார்க்க பில்டர் ஒரு திசையில் அதிரும் வெளிச்சத்தை மட்டும் அதன் வழியா அனுப்பும். மற்ற திசைகளில வரதை அனுப்பாம பிடிச்சு வெச்சுக்கும். இன்னொரு பில்டரை அதன் மேலே 90 டிகிரில வெச்சா ஒரு வெளிச்சமும் வராது. இது சட்டங்கள் வழியே கயிறு ஆடுகிறா மாதிரிதான். இருக்கட்டுமே, என்ன இப்ப? நான் இப்படி பில்டர் எல்லாம் உபயோகப்படுத்த மாட்டேன் னு சொன்னா... இயற்கையிலேயே சிலது இப்படிப்பட்ட வெளிச்சத்தை ரிப்லக்ட் பண்ணுது!

ஒரு ஏரி தண்ணீர் பரப்பு, பெயின்ட் பண்ண உலோகம், பிளாஸ்டிக் – இதெல்லாமே இப்படி செய்யக்கூடும்! நாம எடுத்த ஏரித்தண்ணீர் பரப்பு ஏன் டல்லடிக்குதுன்னு இப்ப தெரியுதா? (இதனாலேயோ என்னவோ வலையில உதாரணம் காட்ட படம் தேடினா கிடைக்கலை!)

எல்லா ரிப்லக்ஷன் மாதிரி இந்த போலரைஸ்ட் ரிப்லக்ஷனும் பெர்பெக்ட் இல்லை. கொஞ்சம் டிப்யூஸ் ரிப்லக்ஷன், கொஞ்சம் போலரைஸ் ஆகாத ரிப்லக்ஷன் எல்லாமும் இருக்கும். பளபள பரப்புகள் அதிக போலரைஸ்ட் ரிப்லக்ஷன் கொடுக்கும். அதுக்குன்னு சொர சொர பரப்பு கொடுக்காதுன்னு இல்லை.

பொருள் கருப்பாவோ இல்லை ஒளி ஊடுருவறதா இருந்தாலோ போலரைசெஷன் அதிகமா இருக்கும். பளபள கருப்பு பிளாஸ்டிக் ஷீட் போலரைஸ்ட் வெளிச்சத்துக்கு நல்ல உதாரணம். இது புரிஞ்சா நாம் தேவையானா பில்டரை சரியா பயன்படுத்த முடியும்.

போலரைஸ் ஆன டைரக்ட் ரிப்லக்ஷனும் போலரைஸ் ஆகாத டைரக்ட் ரிப்லக்ஷனும் ஒரே மாதிரி கூட தெரியலாம். போட்டோ எடுக்கிரவங்க பின்ன எப்படி வித்தியாசம் கண்டு பிடிக்கிரதுன்னு கேட்கலாம். முக்கியமான வித்தியாசம் போலரைஸ் ஆனது வெளிச்சம் குறைவா இருக்கும் என்கிறது. பொருள் மின்கடத்தியா இருந்தா அது போலரைஸ்ட் ரிப்லக்ஷனா இருக்காது. பொருள் மின் கடத்தாத இன்சுலேஷன் சமாசாரம்ன்னா அது போலரைஸ்ட் ஆ இருக்கும்.

உதாரணமா பிளாஸ்டிக், செராமிக், கண்ணாடி...
images black plastic ன்னு வலையில தேடி பாருங்க. எல்லாமே எவ்வளோ டல் அடிக்குதுன்னு தெரியும்!
சும்மா ஒரு உதாரணத்துக்கு:

பொருள் முகம் பார்க்கும் கண்ணாடி மாதிரி தெரிஞ்சா அது சாதா டைரக்ட் ரிப்லக்ஷன்.
பளபளப்பான பொருள் ஆனா முகம் பார்க்கிற மாதிரி இல்லை.... ம்ம்ம் பாலிஷ் பண்ண தோல், மரம் ... இது கொஞ்சம் தமாஷ்! காமிரா இதை ஒரு 40-50டிகிரி கோணத்துல பாத்தா அது போலரைஸ்டா இருக்கும்! மத்த கோணங்களில போலரைஸ் ஆகாத டிரக்ட் ரிப்லக்ஷன்! நிச்சயமான வழி போலரைஸ்ட் பில்டரை உபயோகிச்சு பாக்கிறது. வித்தியாசம் இல்லைன்னா அது போலரைஸ்ட் இல்லை.

முழுக்க பாலிஷ் செய்த ஷூ! பளபளப்பா தெரிவது டிரக்ட் ரிப்லக்ஷன். கோணம் மாறியதால டல்லா தெரியறது போலரைஸ்ட்!

வெளிச்சமே இல்லாம போச்சுன்னா அது போலரைஸ்ட்; வெளிச்சம் குறைஞ்சா அது போலரைஸ்ட் ப்ளஸ் போலரைஸ்ட் இல்லாத கலவை.

சிலர் வெளிச்சம் போலரைஸ்டா இருக்கணும், அதை உபயோகிச்சு தான் நினைத்தபடி படம் எடுக்கனும்ன்னு விரும்பலாம். அதுக்கு லென்ஸ் மேலே வைக்கிற பில்டரை நம்பி பிரயோசனம் இல்லை. அது வர வெளிச்சத்தைதானே மாத்தமுடியும்? பில்டரை வெளிச்சத்தின் மூலத்தில வைக்கலாம். இதன் வழியா வெளிச்சம் போய் பொருள் மேலே விழும் போது அது போலரைஸ் ஆகி இருக்கும். இதை லென்ஸ் மேலே வைக்கிற பில்டர் மாத்தும். ஆச்சரியமான விஷயம் என்னான்னா போலரைஸ்ட் வெளிச்ச மூலம் ஸ்டுடியோல மட்டும் இல்லை. இயற்கையாவே கிடைக்குது! மேகமே இல்லாத திறந்த வானம் அருமையான போலரைஸ்ட் ஒளி மூலம். வானம்ன்னு ஒண்ணுமே நிஜமா இல்லைதானே? அது ஒரு மாய தோற்றம். விண்வெளியில சிதறுகிற வெளிச்சம் இப்படி தெரிகிறது. அதனால இது ஒரு ஒளி மூலமா இருக்கிறது ஆச்சரியம் இல்லை. இப்படிப்பட்ட வானத்தை நோக்கி வைக்கிற பொருளை படம் எடுக்கும்போது போலரைஸ்ட் லைட் பில்டர் வேலை செய்யலாம்.

வலது பக்கம் போலரைஸ்ட் பில்டர் போட்டு எடுத்த படம். நன்றி: விக்கிமீடியா

தியரியை செயல்படுத்த...

நல்ல படப்பிடிப்பு காமிராவை சரியா போகஸ் செய்து சரியா எக்ஸ்போஸ் செய்யறது இல்லை. வெளிச்சத்துக்கும் படம் எடுக்கிற பொருளுக்கு ஒரு உறவு இருக்கு. இது சரியா அமையனும். நம்ம வாழ்க்கை போலவே! மேட் பார் ஈச் அதர். பொருளுக்கு தகுந்த வெளிச்சம் , வெளிச்சத்துக்கு தகுந்த சப்ஜெக்ட்! இந்த பொருத்தம் என்கிறது ஆளுக்கு ஆள் வேறுபடும். அது போட்டோக்ராபரோட கலைநயம். ஒளியையும் அது பொருட்களை எப்படி பாதிக்குது என்றும் அவர் சரியா புரிஞ்சு கொண்டு இருந்தார்ன்னா அது நல்லாவே அமையும்.
போட்டோ என்கிறது ரிப்லக்ஷனோட ஒரு பதிவு என்கிறதால எந்த மாதிரி ரிப்லக்ஷன் இந்த பொருளுக்கு வேணும்ன்னு முடிவு செய்து அதை சாதிக்கணும். ஸ்டூடியோ ன்னா இது ஒளியை சரி செய்வது. இல்லை வெளியே இயற்கையா எடுக்கறதுன்னா கொஞ்சம் பிரச்சினைதான். காமிராவை சரியான இடம் பாத்து வைக்கணும். சரியான நேரத்துக்கு காத்து இருக்கனும். சூரியன் வெளியே வருமா? மேகங்கள் இருக்கா? அது கருப்பா வெள்ளையா? இப்படி பல கேள்விகளுக்கு சரியான விடை வேணும். நம்ம வீட்டு எதிரே இருக்கிற பூங்காவில் இருக்கிற சிலைன்னா இப்படி நாள் கணக்கில காத்து இருக்கலாம். எப்பவும் சாத்தியப்படுமா? இது கஷ்டம்தான். அதனால் இருக்கிற ஒளி எப்படி இருக்கு, அது என்ன செய்ய முடியும்ன்னு கவனிக்கறவங்க நல்ல போட்டோ எடுக்கலாம்.

காரமுந்திரி I.
காரமுந்திரி II

கார முந்திரி III
கார முந்திரி IV
கார முந்திரி V
கார முந்திரி VI
காரமுந்திரி VII

-திவா
‘சித்திரம் பேசுதடி’
http://chitirampesuthati.blogspot.com/

முதல் சுற்றுக்கு முன்னேறிய பதினைந்து - டிசம்பர் போட்டி: ‘உன்னைப் போல் ஒருவன்’

2011-12-23T17:55:00.001+05:30

‘இவனைப் போல் இவன், பாருங்கள்’ என எழுபத்தைந்து பேர்கள் உற்சாகமாகப் போட்டியில் கலந்து கொண்டிருந்தீர்கள். பலரும் மிக அருமையான படங்களைத் தந்திருந்தீர்கள். அவற்றில் முதல் சுற்றுக்குப் பத்தாக இல்லாமல் பதினைந்தை அழைத்து வந்துள்ளோம். (படங்கள் வரிசைப்படியானவை அல்ல).

# கீழைராஸா

# ஷ்ரவ்யன்

# ஒளித்தச்சன்

# குசும்பன்

# மெர்வின் ஆன்டோ

# தருமி

# இளங்குமரன்

# ராஜசேகரன்

# R கனிமொழி

# ஸ்வர்ணராஜன்

# கார்த்தி

# கடலை மிட்டாய்

# Chan

# ஜகன்

# R N சூர்யா

பதினைந்து பேருக்கும் வாழ்த்துகள்!

முதன்முறையாகக் கலந்து கொண்ட சிலரது முயற்சிகளும் நன்றாக இருந்தன. தொடர்ந்த பங்கேற்பில் இன்னும் சிறப்பாக எடுக்க ஆரம்பிப்பீர்கள் என்பதில் PiT-க்கு நம்பிக்கை உண்டு. எங்கள் நோக்கமே ‘ஆர்வம் அணையாமல் தொடர்ந்து நண்பர்கள் படங்கள் எடுக்க வேண்டும். நுணுக்கங்கள் கற்று தேர்ச்சி பெற வேண்டும்’ என்பதே. ஒவ்வொரு மாதமும் தேர்வாகும் படங்களிலிருந்து மட்டுமின்றி பங்கு பெறும் படங்களிலிருந்தும் அறிந்து கொள்ளவும் கற்றுக் கொள்ளவும் நிறைய பாடங்கள் உள்ளன என்பதை நினைவில் கொள்வோம். தொடர்ந்து எடுத்துப் பழகுவோம்.

இறுதிச் சுற்று முடிவுடன் விரைவில் சந்திக்கிறோம்.

நண்பர்களுக்கு PiT-ன் கிறுஸ்துமஸ் வாழ்த்துகள்!

***

சின்ன கேமரா... பெரிய்ய்ய்ய படம்.

2011-12-20T22:19:00.000+05:30

அனைவருக்கும் வணக்கமுங்க. ரொம்ப நாள் கழிச்சு சந்திக்கிறோம் இல்லீங்களா ?

என் கிட்ட பாயிண்ட் அண்ட் ஷூட் கேமரா தான் இருக்கு நல்ல ஜூம் இல்லை... என்னால நிலாவை எல்லாம் எடுக்க முடியுமான்னு கவலைப் படறவங்களா நீங்க... நான் வழக்கமா சொல்றது தாங்க. பென்சில் எது இருந்தாலும், அது நல்ல ஓவியங்களை தானா வரைவது இல்லை. அது யார் கையில் இருக்கிறது, அது எப்படி பயன்படுத்தப் படுகிறது என்பதில் தான் விஷயமே இருக்கிறது.

சரி இந்தப் பதிவு உங்களுக்காகத் தான். மேலே தொடர்ந்து படிங்க

இதுல ஆர்ச்சோட ட்யூப்லைட்டும் தெரியுற படம் இருக்கே அது ஜூம் இல்லாமலே அப்படியே எடுத்தது.

ட்யூப்லைட் பக்கத்துல இருக்கிறது 4 எக்ஸ் ஜூமோட எடுத்தது. சரிங்களா.

சரி. இப்ப வீட்ல பசங்க விளையாட வச்சிருப்பாங்களே பைனாகுலர் .. அதை சுட்டுக்கோங்க. அதன் ஒரு பகுதிய கேமராவோட விரிந்து நீளும் பகுதிமேல் இணைச்சு பிடிச்சுக்கோங்க. ஆச்சா.. இப்ப அப்படியே பாத்தீங்கண்ணா... வட்டமா நடுவில 11:35 காமிக்கிற படம் ஜூம் எதுவும் இல்லாம + பைனாகுலர் அட்டாச் பண்ணது.

10,9,8 அப்படின்னு நம்பர் காமிச்சுட்டு இருக்கிற படம் - 2 எக்ஸ் ஜூம்+பைனா குலர்ல எடுத்தது.

வெறும் கடிகாரத்தின் கைகள் மட்டும் காமிக்கிற படம் இருக்கில்லையா அது 4 எக்ஸ் ஜூம்ல + பைனாகுலர் அட்டாச்மெண்ட்டோட எடுத்தது.

இதோட ஜூம் அளவு என்னன்னு தெரியுமா? அப்ராக்ஸிமேட்டா 400 எம் எம் கணக்கு. :)

நான் நிலவை எடுத்தது 300 எம் எம் அளவு. http://www.flickr.com/photos/iyappan/6482039409/

முக்கியக் குறிப்பு. எஸ்.எல்.ஆர் அளவுக்கு அதே தரம் கிடைக்காதுன்னாலும் ஏற்கக் கூடிய தரத்தில் கிடைக்கும். அதை விட முக்கியமா படம் எடுக்கும் போது கை கொஞ்சம் அசங்கினாலே ப்ளர்ராகிடும். கடைசி படம் ( கடிகாரத்தின் கைகள் மட்டும் கொண்டது ) அதற்கு உதாரணம். கொஞ்சம் நல்ல குவாலிட்டி வேணும்னா 150 - 200 க்கு கிடைக்கும் பைனாகுலர் பர்மா பஜார்ல தேடி வாங்குங்க. ப்ளாஸ்டிக் லென்ஸ் இல்லாம கண்ணாடி லென்ஸா இருக்கும். குவாலிட்டியும் நல்லா வரும்.

இப்ப சொல்லுங்க. பாயிண்ட் அண்ட் ஷூட் வச்சும் நீங்க பட்டைய கிளப்ப முடியுமா முடியாதா ?

கருப்பு வெள்ளை -எளிய முறை.

2011-12-20T05:52:00.001+05:30

கருப்பு வெள்ளை -எளிய முறை.படத்தை கிம்பில் திறவுங்கள்.முன்ணணி வண்ணம் கருப்பாக இருக்குமாறுபார்த்துக்கொள்ளுங்கள்

ஒரு புதிய லேயரை திறந்து அதை கருப்பு வண்ணத்தால் நிரப்புங்கள்.

இனி Layer Mode -> Color ஆக மாற்றுங்கள்

பின்ணணி லேயரை தெரிவு செய்து பின் Colors-> curves தேர்வு செய்யுங்கள்.

உங்களின் இரசனைக்கு ஏற்ப இங்கே(Value, Red, Green Blue ) மாற்றிப்பாருங்கள்.

இந்த இடுகையில் சில குறிப்புகள் உங்களுக்கு தேவைப்படலாம்.

கோணக் கொத்தும் அதன் முக்கியத்துவமும்- ஒளி - காரமுந்திரி-VII

2011-12-05T12:25:00.002+05:30

அடுத்து டிரக்ட் ரிஃப்லெக்ஷன்.

ம்ம்ம்ம்ம் ஒளியை ரிஃப்லெக்ட் செய்யறது பேப்பருக்கு பதில் ஒரு பிரதிபலிக்கிற கண்ணாடின்னு வெச்சுக்கலாம்.

ஒளி மூலம் இருக்கும் இடத்தைப் பொறுத்து ஒரு இடத்தில இருக்கிற காமிராதான் அதை பார்க்கும். மற்ற இடங்களில வைக்கிற காமிராக்கள் பார்க்கா.

திருப்பியும் ஸயன்ஸ்_க்கு போக எந்த கோணத்தில ஒளி கண்ணாடியை தாக்குதோ அதே கோணத்துல அது திருப்பி விடப்படும். அதனால டிரக்ட் ரிஃப்லெக்ஷன் பார்க்கப்படுமா என்கிறது ஒளி மூலம், பொருள், காமிரா பார்க்கிற இடங்கள் இவை இருக்கிற கோணங்களை பொறுத்தது. கீழே இருக்கிற படத்தில காமிரா 1&2 நேரடியா விளக்கை பார்க்கா. காமிரா 3 பார்க்கும்!

ஒளி ரிஃப்லெக்ட் ஆகிற கோணத்துல இருக்கிற காமிரா ஒளி மூலத்தையே - அதாவது அதன் வெளிச்சத்தை அதே அளவே பார்க்கணும்.

மற்ற இடங்களில இருக்கிற காமிராக்கள் இந்த ஒளியை பார்க்க முடியாது இல்லையா? அதனால அது கருப்பாகவே பார்க்கும்.

{ஆனால் இப்படி உண்மையில நடக்கிறதில்லை. ஏன்னு யோசியுங்க! பதில பின்னூட்டமா கொடுங்க.}

இந்த கண்ணாடி மாதிரியே பாலிஷ் பண்ண உலோகம், தண்ணீர் எல்லாம் நடந்துக்கும்!

"ஒளி மூலத்தையே - அதாவது அதன் வெளிச்சத்தை அதே அளவே பார்க்கணும்.” இதை படிச்சப்ப கொஞ்சம் சந்தேகம் வந்ததா?

"நெசமாவா? அதே அளவு வெளிச்சத்தைப் பார்க்கும்? எவ்வளோ தூரம் ஆனாலுமா? இப்பதானே இன்வர்ஸ் லா_ன்னு படிச்சோம்? தூரம் அதிகமாக இருந்தாலுமா?”

ஆமாம். ஒரு சின்ன சோதனையில சந்தேகத்தை நீக்கிக்கலாம். ஸ்கூல்ல விளையாட்டு பசங்க கண்ணாடியை பயன்படுத்தி நம்ம கண்ணில சூரிய வெளிச்சத்தை அடிச்சது நினைவிருக்கா? அப்ப சூரியன் அளவு வெளிச்சத்தைதானே பார்த்தோம்? ஆனா சூரியன் எவ்வளோ தூரத்தில இருக்கு? :-))

கிடக்கட்டும்.

ஒரு விளக்கை தூரத்தில வெச்சு காமிராவால கண்ணாடில ரிப்லெக்ஷனை பார்க்கலாம். அதையே பாதி தூரத்துக்கு கொண்டு வந்தும் பார்க்கலாம். படத்துல வெளிச்சம் அதேதான் இருக்கும். ஆனா விளக்கோட சைஸ் -அளவு- அதிகமாயிடுத்து!

இரண்டு மடங்கு வெண்ணையை இரண்டு மடங்கு ப்ரெட் ஸ்லைஸ் மேலே தடவற மாதிரிதான். வெண்ணை திக்னஸ் மாறாது! ஒளியோட மொத்த அளவு மாறலை. ஆனா அது பரவின இடம் அதிகமானதால முன்னே இருந்த வெளிச்சமே இருக்கு!

எதுக்கு இதை தெரிஞ்சுக்கணும்?

டிரக்ட் ரிப்லெக்ஷன் ல ஒளி மூலத்தை பார்க்க முடிவதால அது கிட்டே வந்தா எப்படி இருக்கும்ன்னு கற்பனை செய்ய முடியும். அதனால பாலிஷ் பண்ண பொருட்கள் எவ்வளவு ஹைலைடோட தெரியணும்ன்னு திட்டம் போட்டு ஒளி மூலத்தை அமைக்கலாம்.

இது வரைக்கு கோணம்_ன்னு ஒருமையிலேயே பேசிகிட்டு இருந்தோம். ஆனால் ஒளி மூலத்தைப் பொறுத்து இது ஒருமையா இல்லாம போகலாம். ஒரு பெரிய ஒளி மூலமா இருந்து கிட்டேயும் இருந்தா ஒளி ரிப்லக்ட் ஆகிறது ஒரே ஒரு கோணமா இராது. ஒரு கொத்து கோணங்களா இருக்கும். இதை "பாமிலி ஆஃப் ஆங்கிள்ஸ்" என்கிறாங்க. ஏன் இப்படி?

ரிஃப்லக்ட் பண்ணுகிற பரப்பு ஒரு சின்ன துகள் இல்லை. பல துகள்கள் கொண்ட பரப்பு. ஒவ்வொரு துகளும் ஒளியை ப்ரதிபலிக்கும் இல்லையா? வெகு தூரத்தில இருக்கிற சூரியன்னா ஒண்ணும் பிரச்சினை இராது. ஆனா கிட்டே இருக்கிற ஒளி மூலத்தை இவை ஒவ்வொன்னும் ஒவ்வொரு கோணத்துல பார்க்கிற வாய்ப்பு இருக்கு. அப்ப திருப்பப்படுகிற ஒளி வெவ்வேறு கோணத்தில இருக்கும். அதனால காமிராவால இதை பார்க்கக்கூடிய இடம் ஒரு சின்ன அளவா இல்லாம பெரிசாக ஆயிடும்.

இந்தக் கோண கொத்து போட்டோகிராபர்களுக்கு மிக முக்கியம்.

யாரும் ஒரு பொருளை நல்லாப் பார்க்க நாம் போடுகிற விளக்கு போட்டோவில வரதை விரும்ப மாட்டோம். அல்லது ஒரு நல்ல வெளிச்சம் தருகிற ஜன்னல், கதவு இது போல இருக்கிறதெல்லாம் படத்தில வரதை விரும்ப மாட்டோம். அதே போல பாலிஷ் பண்ண உலோகம், கண்ணாடி மாதிரி சமாசாரம் எல்லாம் படத்தில இருக்கப்போகிறதுன்னா நம்ம காமிராவுக்கு அதிலேந்து பிரதிபலிச்சு வெளிச்சம் வருமா? அதை எவ்வளவு தூரம் அனுமதிக்கலாம்_ன்னு எல்லாம் யோசனை செய்யணும்.

From reflection

நாம படம் எடுக்கிற பொருளுக்கும் ஒளி மூலத்துக்கும் இருக்கிற கோணம் தெரியும் என்கிறதால காமிரா இந்த கோண கொத்துக்குள்ளே வராதுன்னா தைரியமா படம் எடுக்கலாம். இதையே வேற மாதிரியும் யோசனை பண்ணலாம்,
காமிரா இந்தப் பள பள பொருளைப் பார்க்கிற கோணம் இருக்கு இல்லையா? அதை வெச்சு அதோட பிரதிபலிப்பு கோணங்கள்குள்ள ஒளி மூலம் இருக்கான்னும் பார்க்கலாம்.

போட்டோ எடுக்கும்போது சில சமயம் ஒரு பளபளப்பான பொருள் முழுதும் பளபளப்பு தெரியணும்ன்னு விரும்பலாம். அப்ப ஒளி மூலம் பெரிசா இருக்கும் படி பாத்துக்கணும். அப்பதான் கோணக்கொத்து பெரிசா இருக்கும்.

மற்ற சமயங்களில டிரக்ட் ரிப்லக்ஷனே இருக்கக்கூடாதுன்னு நினைக்கலாம். அப்படிப்பட்ட சமயம் காமிராவோட பார்வையில கோணக்கொத்தில ஒளி மூலம் இல்லாம பாத்துக்கணும்.

--

காரமுந்திரி I.
காரமுந்திரி II

கார முந்திரி III
கார முந்திரி IV
கார முந்திரி V
கார முந்திரி VI

-திவா
‘சித்திரம் பேசுதடி’
http://chitirampesuthati.blogspot.com/

உன்னைப் போல் ஒருவன் - டிசம்பர் 2011 போட்டி அறிவிப்பு

2011-12-01T14:07:00.006+05:30

இரட்டை. ஆனா ஒரே மாதிரியான ரெண்டு.

ட்வின்ஸ். ஆமா, ஒண்ணைப் போல ஒண்ணு.

இப்பப் புரிஞ்சிருக்குமே தலைப்பு? ‘உன்னைப் போல் ஒருவன்’:)!

மூணு வருஷம் முன்னே ‘ஜோடி’ன்னு ஒரு தலைப்பு தரப்பட்டது ஒரு சிலரின் நினைவுக்கு வரலாம். ரெண்டு வேற வேற விஷயங்கள் ஜோடி போட்டு ஜாலியாக் கை கோத்துக்கலாம். இந்தத் தலைப்புக்கு அது கூடாது. அச்சுல வார்த்த மாதிரி இல்லேன்னாலும் ‘அட ஆமா அவனைப் போலவே இவன்’ன்னு சொல்லும்படியா இருக்கணும்.

படத்தில் இரட்டையரே பிரதானமா இருக்கணும்.

ஃபோட்டோஷாப் மிரரிங் உதவியோட சப்ஜெக்ட் டபுளேக்ட் (டபுள் ரோல்) செய்யாம இயல்பான இரட்டையரா இருக்க வேண்டியதும் அவசியம்.

சில மாதிரிப் படங்களைப் பார்க்கலாமா?

# 1 ராமலக்ஷ்மி

# 2 ராமலக்ஷ்மி

# 3 ராமலக்ஷ்மி

# 4 ராமலக்ஷ்மி

# 5

# 6 ஜீவ்ஸ்

# 7 சர்வேசன்

# 8 கருவாயன்

கோதாவில் குதிக்கப் போகும் இரட்டையரை இங்கே வரவேற்க ஆவலாய்க் காத்திருக்கிறோம்.

படங்கள் வந்து சேரவேண்டியக் கடைசித் தேதி 15 டிசம்பர் 2011.

போட்டி விதிமுறைகள் இங்கே.

[பி.கு: ஒவ்வொரு மாதமும் உங்களில் சிலர் படங்களை மின்னஞ்சலில் சேமிப்பாகியிருக்கும் பழைய போட்டி ஐடிக்கே சமர்ப்பித்து வருகிறீர்கள். ஐடி மாற்றமாகிப் பலமாதங்கள் ஆகிவிட்டன. திருத்தம் செய்து கொள்ளுங்கள்.]

2011 நவம்பர் மாத புகைப்படப் போட்டி ‘நண்பர்கள்’ முடிவுகள்...

2011-11-29T12:46:00.000+05:30

வணக்கம் நண்பர்களே..

போட்டியின் முடிவுகளை காண மிக ஆவலுடன் எதிர்பார்த்துக்கொண்டிருப்பீர்கள்.

போட்டிக்கு வந்திருந்த நிறைய படங்கள் நண்பர்களாக இருந்தாலும் பல படங்கள் எளிய குருப் போஸ் போட்டோவாக தான் இருந்தது.. அப்படங்கள் பார்ப்பதற்கு நன்றாக இருந்தாலும் , போட்டி என்று வரும் போது வெறும் குரூப் போஸ் என்பது உதவாது..

அப்படியே போஸ் ஆக இருந்தாலும் , சொல்லி வைத்து எடுத்தது மாதிரி இல்லாமல் இருந்ததால், ஒரு சில படங்கள் மட்டும் முதல் சுற்றில் முன்னேறின..

அப்படி முதல் சுற்றில் முன்னேறிய படத்தில் இருந்து முதல் மூன்று இடங்களை பிடித்த படங்களை பார்க்கும் முன் இந்த சுற்றில் வெளியேறிய படங்களை பார்ப்போம்..

ariya vardhan மற்றும் mangai mano....

ARIYA VARDHAN

MANGAI MANO

இவர்களது படங்கள் இரண்டுமே போஸ் கொடுக்க வைத்த படங்கள் தான்.. இருந்தாலும் சில உணர்வுகள் இருந்ததால் முதல் சுற்றில் முன்னேறியது.. ஆனால் அது மட்டும் இந்த தலைப்புக்கு பத்தாது.. அதே சமயம் இந்த மாதிரி கொஞ்சம் கம்போஸிசன் செய்திருந்தால் படங்கள் இன்னும் கொஞ்சம் நன்றாக இருக்கும்...

அடுத்தது ramabhadran அவர்களின் படம்...

RAMABHADRAN

பெரியவர்களின் இயல்பான சந்திப்பை படமாக்கியுள்ளார், படமும் பார்ப்பதற்க்கு நன்றாக இருக்கின்றது.. இருந்தாலும் அந்த டோன் கொஞ்சம் ஓவர் saturation ,அதே சமயம் நான்கு பேரும் பேசிக்கொண்டிருந்தால் இந்த தலைப்புக்கு நன்றாக இருந்திருக்கும். மூன்றாவதாக இருப்பவர் எங்கேயோ பார்த்துக்கொண்டிருப்பது சிறு குறை.. இந்த படத்தை பார்க்கும் போது நட்பு என்பதை விட ஒரு சந்திப்பு போல் தோன்றுவதால் இப்படம் வெளியேறுகின்றது..

# இந்த டோன்... சிறப்பாக இருந்திருக்கும்..

அடுத்தது rohini அவர்களின் படம்...

ROHINI

பார்ப்பதற்க்கு மிக அழகான படம்.. அந்த குழந்தையும் , பொம்மையும் ஒரே மாதிரி உட்கார்ந்து இருப்பது நன்றாக இருக்கின்றது... இதனால் இந்த சுற்றில் முன்னேறியது.. ஆனால் அந்த குழந்தை பொம்மையிடம் விளையாடுவது போல் இருந்திருந்தால் இன்னும் நன்றாக இருந்திருக்கும்.. இருவரும் தனித்தனியாக இருப்பது, படத்தின் டோன், இரண்டும் சிறு குறை.. எனவே இந்த சுற்றில் இப்படம் வெளியேறுகின்றது.. கொஞ்சம் இப்படி டோன் மாற்றினால் படம் இன்னும் தெளிவாக இருக்கும்...

அடுத்தது gnans அவர்களின் படம்...

GNANS

படத்தில் நட்பின் உணர்வுகள் மிக அழகாக இருப்பதால் இந்த சுற்றில் முன்னேறியது.. படத்தில் வண்ணங்களும் அருமை.. ஆனால் படத்தில் composition என்று வரும் போது சிறு குறையாக தெரிகின்றது.. முடிந்திருந்தால் இன்னும் கொஞ்சம் க்ளோசாக படம் எடுத்திருக்கலாம்.. இப்படத்தை இந்த மாதிரி compose செய்தால் இன்னும் கொஞ்சம் நன்றாக இருந்திருக்கும்..

அடுத்தது ஆதவன் அவர்களின் படம்..

AADHAVAN

நல்ல composition , நல்ல timing, படமும் B& W ல் நன்றாக இருக்கின்றது.. நண்பர்களின் உணர்வுகளை முன்னாடி படம் பிடித்திருந்தால் இந்த தலைப்பிற்கு இன்னும் நன்றாக இருந்திருக்கும் என்று நினைக்கின்றேன்..

அடுத்தது maha tamil prabhakaran அவர்களின் படம்..

MAGA TAMIL PRABHAKARAN

இந்த தலைப்பிற்கு எனக்கு மிகவும் பிடித்த படம் இது.. ஆனால் selective colouring என்ற பெயரில் தேவையில்லாமல் படத்தை சொதப்பிவிட்டார் என்றே சொல்ல வேண்டும்.. அதை முழுவதுமாக b&wல் இருந்திருந்தாலே நன்றாக இருந்திருக்கும்... அதே சமயம் கொஞ்சம் கீழே உள்ள மாதிரி க்ராப் செய்திருக்கலாம்... இருந்தாலும் இப்படம் ஒரு நல்ல moment ஐ பிடித்ததற்காக வாழ்த்துக்கள்..
அடுத்தது sathiya மற்றும் truth அவர்களின் படங்கள்...

SATHIYA

TRUTH

இது வரை நாம் பார்த்த படங்களில் எல்லாம் எதோ ஒரு சிறு குறை படத்தின் composition ல் இருந்தது... ஆனால் இவர்கள் இருவரின் படங்களிலும் அந்த குறை சுத்தமாக இல்லை.. சரியான colour , distraction இல்லாத background,இவைகள் இப்படங்களுக்கு பலம்..

truth படத்தில் புன்னகை மற்றும் சத்தியா படத்தில் விளையாட்டும் மிக அருமை..

ஆனால் இவர்கள் இரண்டு படங்களையும் பார்க்கும் போது படத்தில் இருப்பவர்கள் நண்பர்கள் என்று சொல்வதை விட சொந்தங்கள் என்று தான் சொல்ல தோன்றுகின்றது..

இந்த படங்களில் குறைகள் என்று ஒன்றும் இல்லை.. தலைப்புக்கு என்று வரும் போது சற்று யோசிக்க வேண்டியதாகின்றது..

சொந்தங்கள் அல்லது தெளிவான படங்கள் என்று தலைப்பு இருந்திருந்தால் இப்படங்கள் கண்டிப்பாக பொருத்தமாக இருந்திருக்கும்...

அடுத்தது மூன்றாம் இடத்திற்கு போட்டி போடும் படங்கள்

kuti paya மற்றும் mervin anto

இவர்கள் இருவரின் படமும் கிட்டதட்ட ஒரே மாதிரி படங்கள்.. கடற்கரை , நண்பர்கள் கூட்டம் , பின்னால் இருந்து எடுக்கப்பட்டது...

இவர்களில்,

KUTIPAYA
kutipaya படத்தில் வரும் கடற்கரை மணல் , நீல வானம் ,கடல் இவை அனைத்தும் தெளிவாக படமாக்கப்பட்டுள்ளது.. அதே சமயம் தோழிகள் ரிலாக்ஸாக உட்கார்ந்திருக்கும் அமைப்பு எல்லாம் அருமை.. இவர்களுக்கு முன்னால் வரும் வலது ஓரத்தில் வருபவர் இல்லாமல் படம் எடுத்திருக்கலாம்.. அதே சமயம் வானத்தில் இவ்வளவு negative space தேவையில்லை. கொஞ்சம் க்ராப் செய்திருக்கலாம்.. கீழே உள்ள மாதிரி கம்போஸ் செய்திருந்தால் நன்றாக இருக்கும்...

அடுத்து mervin anto அவர்களின் படம்,

நண்பர்கள் கூட்டம் , மோதும் அலை , நீல கடல், ஒன்றாக கை பிடித்திருப்பது இவையெல்லாம் இந்த படத்திற்க்கு அழகு சேர்க்கின்றது... படத்தின் composition ம் நன்றாக உள்ளது.. இருந்தாலும் நண்பர்களிடத்தில் இன்னும் கொஞ்சம் உற்சாகம் இருந்திருந்தால் இந்த தலைப்பிற்கு இன்னும் நன்றாக இருந்திருக்கும்..அதே சமயம் படத்தில் கொஞ்சம் over saturation ஆக இருப்பது இது பழைய படம் போல் காட்சியளிக்கின்றது ,shadows ம் கொஞ்சம் அதிகம் என்பது மைனஸ்...

இவர்கள் இருவரின் படங்களில் யார் படம் மூன்றாவது என்று பார்த்தால் தெளிவாக படம் எடுத்ததற்காக

kutipaya அவர்கள் மூன்றாமிடம் பிடிக்கின்றார்..

இரண்டாமிடம்,

viswanathan அவர்களின் படத்தில் வரும் நண்பர்கள் , அவர்களிடம் தெரியும் சந்தோசம், விளையாட்டு அனைத்தும் இந்த தலைப்புக்கு கச்சிதம்.. இந்த படத்தை பார்க்கும் போது நட்பின் பசுமை நிறைந்த நினைவுகள் கண்டிப்பாக வரும்.. இந்த படம் பிடிக்கப்படிருக்கும் moment மிகவும் அருமை.. நானும் இந்த நட்பின் கூட்டத்தில் சேர்ந்து கொள்ளலாம் போல் உள்ளது..

VISWANATHAN

ஆனால் சொதப்பல் composition , படத்தில் தெரியும் கேபிள் , கட் செய்யப்பட்ட கைகள்.. இவையெல்லாம் இப்படத்தின் பெரிய மைனஸ்... இந்த படம் மட்டும் சரியாக compose செய்யப்பட்டிருந்தால் கண்டிப்பாக முதலிடம் பிடிக்க வாய்பிருந்திருக்கும்...

என்ன தான் composition குறையாக இருந்தாலும் தலைப்பு என்று வரும் போதும் ,நமது பார்வை சிரிக்கும் நண்பர்கள் கூட்டத்தை விட்டும் நகரவில்லை...

எனவே வந்திருந்த படங்களில்,

viswanathan இரண்டாமிடம் பிடிக்கின்றார்...

இந்த மாதிரி கம்போஸ் செய்திருந்தால் இன்னும் நன்றாக இருந்திருக்கும்..

முதலிடம்,
SARAVANAN

சரவணன் படத்தில் இருக்கும் குட்டி நண்பர்கள் கூட்டம் அருமை... ஒவ்வொருவரும் ஒவ்வொரு ரியாக்‌ஷன்.. படம் போஸ் கொடுக்க வைத்து எடுத்திருந்தாலும் படத்தில் இயல்பான நட்பின் உணர்வுகள் அருமையாக படம் பிடிக்கப்பட்டுள்ளது.. படமும் Black and white ல் அருமையாக உள்ளது.. எந்த distraction ம் இல்லை.. compositionலிம் பெரிதாக குறைகள் இல்லை..

கொஞ்சம் crop மற்றும் sharpness குறைத்திருக்கலாம்... அதுவும் படத்தை பெரிதாக பாதிக்கவில்லை..

எனவே
`நண்பர்கள்` போட்டியில் முதலிடம் பிடிப்பது , saravanan அவர்களின் படம்..

வாழ்த்துக்கள் சரவணன்....

இரண்டாமிடம் மூன்றாமிடம் பெற்றவர்களுக்கும் வாழ்த்துக்கள்..

மேலும் போட்டியில் கலந்து கொண்ட அனைவருக்கும் நன்றிகள்...

விரைவில் அடுத்த தலைப்புடன் `நண்பர்கள்` அனைவரையும் சந்திக்கின்றோம்..

அன்புடன்
கருவாயன்.

மென்மை கடுமை - ஒளியின் தன்மை - கார முந்திரி-VI

2011-11-28T19:45:00.006+05:30

மூன்று வித ஒளிச் சிதறல்கள்: டிஃப்யூஸ், டிரக்ட், க்ளேர்(glare).

முன்னேயே பார்த்தது போல எல்லாமே 100% ஒரு வகையா பொருந்தாது. ஒவ்வொண்ணுத்துலேயும் இந்த மூன்றும் வெவ்வேறு அளவில இருக்கும். இது எந்த விகிதம் என்கிறதுலதான் பொருட்கள் ஒவ்வொண்ணும் வித்தியாசமாத் தெரியும். ஆனாலும் இப்ப பார்க்கப் போகிற உதாரணங்கள் எல்லாமே 100% வகையா பார்க்கலாம். அப்பதான் புரிஞ்சு கொள்ள சுலபமா இருக்கும். இயற்கையில அரிதாகவே இப்படிப்பட்ட உதாரணங்கள் கிடைக்கும், அதே போல ஒளி மூலத்தைப் பற்றி இப்ப கவலைப்பட போறதில்லை. எந்த ஒளியும் வேலை செய்யும்.

முதலாவது டிஃப்யூஸ் ரிஃப்லெக்ஷன். பொருள் மேலேபடும் ஒளி சீராக எல்லாப் பக்கமும் சிதறடிக்கப்படும். அதனால எந்த பக்கத்திலேந்து அதை பார்த்தாலும் அதே பிரகாசம் இருக்கும். உதாரணமா ஒரு வெள்ளை அட்டை. அதை எந்த பக்கத்தில இருந்து போட்டோ எடுத்தாலும் ஒரே பிரகாசத்தோட தெரியும்.

இந்த மாதிரி உதாரணங்கள் சொல்கிறப் புத்தகங்களில் தவிர எங்கேயும் சீராக ஒளியைச் சிதறடிக்கிற பொருள் கிடையாது! வெள்ளை காகிதம் / அட்டை கிட்ட கிட்ட வரும்! வெள்ளையா இருக்கற எதுவுமே ஏறக்குறைய சீராக ஒளியை திருப்பும். சந்தேகமான ஒரு நடை வீட்டை சுத்தி போய் வாங்க. வெள்ளை பொருட்கள், கருப்பு பொருட்களை வெவ்வேறு கோணங்களிலே பாருங்க. வெள்ளை பொருட்கள் அனேகமா ஒரே மாதிரி பிரகாசத்தோடதான் தெரியும்.

# இங்கே சுவர், புத்தக அட்டை, விளக்கின் பீங்கான் base,மேலிருக்கும் shade-ன் துணி, பிளாஸ்டிக் அழகுப் பொருட்கள் என எல்லாமே ஒருசீரா ஒளியைத் திருப்புறதாலேயே இப்படி அதிபிரகாசமாத் தெரியுது. ஆனால் கருப்பு அப்படி இல்லை. ஒவ்வொரு கோணங்களிலே ஒவ்வொரு மாதிரி தெரிய வாய்ப்புகள் அதிகம்.

இந்த டிஃப்யூஸ் என்கிற வார்த்தை சொல்கிற போது இன்னொரு விஷயம் நினைவுக்கு வருது. டிஃப்யூஸ் லைட்டிங்-ன்னு சொல்கிறதும் இதுவும் ஒண்ணு இல்லை. எப்பவும் சின்ன ஒளி மூலத்திலேந்து வர ஒளி ஹார்ட் ஆ இருக்கும். பெரிய ஒளி மூலத்திலேந்து வரது ஸாப்டா இருக்கும்.

சில சமயம் ஒரு ஒளி மூலத்தை சில பொருட்களைப் பயன்படுத்தி - ஒரு வெள்ளை குடையைப் பிடித்து அதன் மேலே படுகிற வெளிச்சத்தை திருப்பியோ, அக்ரிலிக் ஷீட்டை குறுக்கே வைத்தோ - இப்படிச் சிதறடிச்சு பொருள் மேலே ஒளியை பட வைக்கறதுண்டு. இது டிப்யூஸ் ட்ரான்ஸ்மிஷன் அல்லது டிஃப்யூஸ் ரிப்லெக்ஷனை பயன்படுத்தினாலும் இது ஒளி மூலத்தை மாத்தறது மட்டுமே.
#

பொருள் மேலே படுகிற ஒளி டிப்யூஸ்-ஆ இருக்கலாம், இல்லாமல் இருக்கலாம். பொருள் மீது படும் ஒளி "டிஃப்யூஸ் ரிஃப்லெக்ஷன்" ஆகிறதா என்கிறது வேற விஷயம். ஒளியை சிதறடிக்கிறது பொருள்தானே ஒழிய ஒளி மூலம் இல்லை.

ஒரு ஒளி மூலமானது ஒளி வகையைதான் நிர்ணயிக்க முடியும். பொருளின் மேற்பரப்புதான் ரிஃப்லெக்ஷன்-ஐ நிர்ணயிக்கிறது. ஆகவே பொருளின் தன்மை பொருத்து எந்த ஒளியும் எந்த ரிஃப்லெக்ஷனும் உண்டாக்கலாம்.

சரி, ஒளி மூலத்தின் கான்ட்ராஸ்ட் வேறு பட்டா ரிப்லெக்ஷனும் வேறுபடுமா? இல்லை. ஹார்ட் வெளிச்சமோ ஸாப்ட் வெளிச்சமோ எப்படி இருந்தாலும் ஒரே மாதிரிதான் ரிஃப்லெக்ஷன் இருக்கும். நிழல்கள் வேறுபடும். ( சின்ன ஸோர்ஸ், ஹார்ட் லைட்- ஹார்ட் ஷேடோ; அகல ஸோர்ஸ், ஸாஃப்ட் லைட், ஸாஃப்ட் ஷேடோ.) ஆனால் படத்தின் ஹைலைட்ஸ் ஒரே மாதிரிதான் இருக்கும்.

வெளிச்சம் படும் கோணம் அல்லது வெளிச்ச மூலம் இவற்றுக்கும், ரிஃப்லக்ட் ஆகும் டிஃப்யூஸ் வெளிச்சம் எப்படி இருக்கு என்பதற்கும் சம்பந்தம் இல்லை. ஆனால் ஒளி மூலம் எவ்வளோ கிட்டே இருக்கு என்பதற்கு சம்பந்தம் இருக்கு, எவ்வளோ கிட்டே இருக்கோ அவ்வளோ பிரகாசமா தெரியும். அதனால ஒளி மூலம் கிட்டே வந்தா, எக்ஸ்போசர் செட்டிங்-ஐ மாத்தலைன்னா நமக்கு கிடைக்கிற படத்துல வெளிச்சம் அதிகமாகிடும்.

இது ஒரு இன்வெர்ஸ் ஸ்கொயர் லா. அதாவது தூரம் அதிகமாக ஆக அந்த தூரம் எவ்வளோ அதிகமாகுதோ அதன் ஸ்கொயர் அளவு வெளிச்சம் குறையும். இருக்கிற இடத்திலேந்து ரெண்டு மடங்கு தூரம் தள்ளி வெச்சா நாலு மடங்கு பிரகாசம் கம்மியாகும். மூணு மடங்கு தள்ளி வெச்சா ஒன்பது மடங்கு குறையும். சரிதானே?

இந்த ஸயன்ஸ் எல்லாம் வேண்டாம்ன்னா பரவாயில்லை. ஒளி மூலம் கிட்டே வர வர படத்துல வெளிச்சம் அதிகமாகும்-ன்னு புரிஞ்சா சரி. அட, இதென்ன பெரிய விஷயம் ன்னா, சில சமயம் சில பொருட்கள் அப்படி நடந்துக்காது என்கிறதுதான்! பின்னால் பார்க்கலாம்.
***

படங்கள்: இணையத்திலிருந்து...

காரமுந்திரி I.
காரமுந்திரி II

கார முந்திரி III
கார முந்திரி IV
கார முந்திரி V

-திவா
‘சித்திரம் பேசுதடி’
http://chitirampesuthati.blogspot.com/

2011 நவம்பர் மாத புகைப்பட போட்டி.. முதல் சுற்றில் முன்னேறிய `நண்பர்கள்`.

2011-11-26T21:39:00.001+05:30

வணக்கம் நண்பர்களே..

இந்த முறை `நண்பர்கள்` போட்டிக்கு கிட்டதட்ட 85 படங்கள் வந்தது மிகவும் மகிழ்ச்சி.. அதிலிருந்து முதல் சுற்றை தேர்ந்தெடுக்க சற்றே சிரமமாகிவிட்டது, தாமதமும் ஆகிவிட்டது..

வந்திருந்த படங்களிலிருந்து முதல் சுற்றிற்க்கு முன்னேறிய படங்களின் அணிவகுப்பு.... இதில் எதுவும் வரிசை படி கிடையாது..

TRUTH

VISWANATHAN

ROHINI

RAMABHADRAN

MERVIN ANTO

MANGAI MANO

SARAVANAN

KUTIPAYA

GNANS

ARIYA VARDHAN

AADHAVAN

MAGA TAMIL PRABHAKARAN

SATHIYA

விரைவில் முதல் மூன்று இடங்களுடன் தங்களை சந்திக்கின்றேன்...

நன்றி
கருவாயன்

தமிழ் விக்கிப்பீடியா ஊடகப் போட்டி

2011-11-23T22:49:00.001+05:30

தமிழ் விக்கிப்பீடியா ஊடகப் போட்டி ஒன்றை நடத்துகிறது. தமிழ்-தமிழர் தொடர்புடைய புகைப்படங்கள் / காணொளிகள் / ஒலிப்பதிவுகளுக்கான போட்டி இது.

போட்டிக்கான புகைப்படங்கள் போட்டி வலைவாசல் வழியாக விக்கிமீடியா காமன்ஸ் தளத்தில் பதிவேற்றப்பட வேண்டும். போட்டியில் பங்கு பெறுவது மட்டுமல்லாது, நம்மிடம் உள்ள தமிழ்-தமிழர் தொடர்புடைய புகைப்படங்கள், காணொளிகள், ஒலிப்பதிவுகள் என்பனவற்றைப் பிறருடன் பகிர்ந்து கொள்ள இது ஒரு வாய்ப்பு என்பது என் கருத்து.

போட்டி வலைவாசல்:
http://ta.wikipedia.org/wiki/contest

தமிழ் விக்கிப்பீடியா:

http://ta.wikipedia.org/

இப்பதிவை இங்கு பதிவிட ஆதரவளித்த PiT உறுப்பின நண்பர்களுக்கு என் நன்றிகள்!

அன்புடன் அன்டன்

நவம்பர் 2011 மாதப் புகைப்பட போட்டி அறிவிப்பு..

2011-11-01T22:49:00.003+05:30

அன்பு நண்பர்களே,

அனைவருக்கும் வணக்கம்.. இந்த மாதத்திற்கான போட்டியை மிக ஆவலுடன் எதிர்பார்த்துக்கொண்டிருப்பீர்கள்..

இந்த மாதத்திற்கான தலைப்பு இந்த பதிவின் ஆரம்பத்திலேயே வருது பாருங்க..

அதாங்க... நண்பர்களே..

இந்த மாதத்திற்கான தலைப்பு: நண்பர்கள்..

மாதிரி படங்கள்

போட்டிக்கான விதிமுறைகள் இங்கே

படம் வந்து சேர வேண்டிய கடைசி தேதி 15-11-2011

நட்புகளை,நண்பர்களை, படம் பிடித்து சும்மா அசத்த வாங்க நண்பர்களே...

நட்புடன்
கருவாயன்

மறந்தவை - அக்டோபர் 2011 - முடிவுகள்

2011-10-28T07:56:00.001+05:30

ஐம்பதுக்கும் மேற்பட்ட படங்கள் 'மறந்தவை' தலைப்புக்கு பொறுத்தமாக வந்திருந்தது. அதில் முந்திய பத்தை சமீபத்தில் கட்டம் கட்டி காட்டியிருந்தேன்.

போட்டியில் வெற்றி பெற்ற முதல் மூன்று படங்களை இனி காணலாம்.

ஒரு படத்தை கட்டம் கட்டுவதில் அநேகமாய் அனைவரும் நன்றாகவே தேறியிருக்கிறோம்.

சிலப் பல திருத்தங்கள் மட்டும் தேவை.
murugeshஹ்ன் மர்ஃபி ரேடியோ பின்னணியில் தெரியும் சிகப்பு , பெரிய கதவு, இதெல்லாம் ப்ரதான படத்தின் மேல் உள்ள பிடிப்பை குறைத்து விடும்.

SSB படம், க்ளோஸ் அப் ரொம்பவே அதிகம். இன்னும் வெள்ளை பின்னணி அதிகமாய் தெரிந்து, மறந்துபோன சட்டியின் தனிமை 'சோகமாய்' பிரதிபலித்திருந்தால் பன்ச் கூடியிருக்கலாம்.

AjinHari, கீழே இருக்கும் பெயர் பலகை, படத்தை பார்க்க விடாமல் தடுக்கிறது. அவ்ளோ பெரிய பேர் வேண்டாமே. சிறுசா இனிஷயல் மட்டும் இருந்தா படம் பிரதானப் படும். (வல்லி மேடம், சேம் டு யூ. உங்க படங்களில், பெயர் படத்தின் குறுக்கே போட்டுடறீங்க. நன்றல்ல :) )

varun, நல்ல முயற்சி. ஆனா, மஞ்சள் தண்ணி ஒட்டலை.

அப்ப, பரிசு யாருக்கு? இவிகளுக்குத்தான்.

மூன்றாம் இடம், Kumaraguru:

இரண்டாம் இடம், decon clickz

முதல் இடம், R.N.Surya. மிகத் துல்லியமான க்ளிக் இது. போதிய வெளிச்சம், ஷார்ப், நல்ல சப்ஜெக்ட், சரியான கட்டம் என படம் அருமையாய் வந்திருக்கிறது.

வெற்றி பெற்றவர்களுக்கு வாழ்த்துக்கள்!
தீபாவளி நல்வாழ்த்துக்களும் உரித்தாகுக.

நவம்பரில் வேறொரு தலைப்புக்கு, க்ளிக்கிக் கலக்குவோம்.
அறிவிப்பு விரைவில்.

மறந்தவை - முந்திய பத்து - Oct 2011

2011-10-24T08:29:00.000+05:30

வணக்கம். போட்டிக்கு வந்த ஐம்பதுக்கும் மேலான படங்களை ஆராய்ந்து முதல் பத்து இடங்களை பிடித்தவையை கீழே கட்டம் கட்டியுள்ளோம்.

படங்களை பார்ப்பதற்கு முன், மீண்டும் ஒருமுறை இரு விஷயங்களை ஞாபகப் படுத்த ஆசைப்படுகிறேன்.
1) தேர்வு செய்யப்படும் படங்கள், நடுவரின் பார்வையில் கவனத்தை ஈர்த்தவை. அழகு என்பதற்க்கு ஒவ்வொருவருக்கும் ஒவ்வொரு விதமான அளவுகோல் இருக்கும். ஒருத்தருக்கு அழகாய் தெரிவது மற்றவர்களுக்கு தெரியாமல் போகலாம்.

2) PiT குழும நண்பர்கள், பலப்பல வேலைகளுக்கு நடுவே, இந்த இணையதளத்தில் இயன்றவரை புகைப்படத் துரை சார்ந்த பல நல்ல விஷயங்களை பகிர்ந்து வருகிறார்கள். மாதாந்திரப் போட்டிகள், உங்களின், எங்களின், ஆர்வத்தை உந்தவும், நமது திறமயை வளர்க்கவுமே நடத்தப்படுகிறது. சிலர் அதன் காரணம் புரியாமல், போட்டிக்கு இணயத்திலிருந்து 'சுட்ட' படங்களை அனுப்பி விடுகிறார்கள். இது, நம்பிக்கை அடிப்படையில் இயங்கி வரும் போட்டிகளுக்கு கரும்புள்ளியாக ஆகிவிடுகிறது.
இப்படிச் செய்பவர்கள் தவிர்க்கவும்.
மற்றவர்கள், இந்த மாதிரி படங்களை சுட்டிக் காட்டி சம-தளமாக PiT ஐ மாற்ற உதவவும்.

இனி, இந்த மாத போட்டியில் முந்திய பத்தை காணலாம்.

Murugesh

Kumaraguru

SSB

Shadab

AjinHari

decon clickZ

jai

Varun

R.N.Suriya

Shanmuga Kumar

போட்டியில் கலந்து கொண்டு கலக்கிய அனைவருக்கும் நன்றீஸ்.

மாதாந்திரப் போட்டியின் முக்கிய விதிமுறை

2011-10-16T21:26:00.003+05:30

ஒவ்வொரு மாத போட்டி அறிவிப்பின் போது விதிமுறைகளுக்கான லிங்க் கொடுக்கப்படுகிறது. அதில் முதல் விதியே “படங்கள் நீங்களே எடுத்த, உங்களின் சொந்தப் படமாக இருக்க வேண்டும்” என்பதுதான். சென்ற மாதப் போட்டியில் முதல் பரிசாக அறிவிக்கப்பட்ட தினேஷின் படம் இணையத்திலிருந்து எடுக்கப்பட்டிருப்பதைப் பின்னூட்டத்தில் விஜய் சுட்டிக்காட்டியதைத் தொடர்ந்து அப்படம் நீக்கப்பட்டு முறையே விஸ்வநாதனின் படம் முதலாமிடத்தையும், சூர்யாவின் இடம் இரண்டாவது இடத்தையும் பெறுகின்றன. வாழ்த்துக்கள் விஸ்வநாதன், சூர்யா! [திருத்தப்பட்ட பதிவு இங்கே.] அக்கறையுடன் சுட்டிக் காட்டிய விஜய்க்கு நன்றி.

தினேஷ் இதை தெரிந்து செய்திருப்பாரானால் பிட் குழுமம் தன் கடுமையான கண்டனங்களை இங்கு பதிவு செய்கிறது. அறியாது செய்திருப்பின் எச்சரிக்கிறது. ஜூன் போட்டியிலும் ஒருவர் இப்படிக் கொடுத்திருந்ததாக விஜய் குறிப்பிட்டிருந்தார். பிட் குழுமம் வாசகர்கள் மேல் நம்பிக்கை கொண்டே போட்டிகளை நடத்துகிறது. அவை உங்களின் திறமையை ஊக்குவிக்க என்பதை மனதில் கொண்டு இது போன்ற தவறுகள் இனியும் நேராமலிருக்க ஒத்துழைக்குமாறு கேட்டுக் கொள்கிறோம்.

ஒளிச் சிதறல்.. ஒரு புரிதல்..- Knowing Light - கார முந்திரி V

2011-10-03T20:26:00.004+05:30

பொருள் மேலே ஒளி பட்டுத் திருப்பி அனுப்பப் படறதுதான் ரிஃப்லெக்ஷன்-ன்னு பார்த்தோம். அதுக்கு மாதிரி படம் எங்கே? ஹிஹிஹி.. நாம பார்க்கிற எல்லா படங்களுமே இதுக்கு மாதிரி படங்கள்தான். இப்படி ஒளி சிதறி திருப்பி அனுப்பப்பட்டு நம் கண்களை அடையாட்டா நாம் அதைப் பார்க்கவே முடியாது. ஆக ரிஃப்லெக்ஷன் என்கிறது தினசரி எப்போதுமே நடந்துகிட்டு இருக்கிற விஷயம். ஆகவே படம் எடுக்க இது வெகுவாகவே பார்க்கப்பட வேண்டிய விஷயமும் கூட.

இது வரை ஒளி, அதன் நடத்தை ஆகியவற்றைப் பார்த்தோம். ஒளி மூலத்தின் மூன்று முக்கிய தன்மைகள் பிரகாசம், நிறம், மாறுபாடு என்று பார்த்தோம். படமெடுப்பதில் லைட்டிங் என்பதற்கு படம் எடுக்கப்படும் பொருளே வெளிச்சத்தை விட முக்கிய காரணி என்றும் பார்த்தோம். இந்த படம் எடுக்கப்படும் பொருள் ஒளியை ஊடுருவ விடலாம், உள் வாங்கலாம் அல்லது திருப்பி அனுப்பலாம் என்பதையும் பார்த்தோம். இனி மேலே இந்தக் கடைசி விஷயத்தை மேலும் கவனிக்கலாம்.

பொருள் ஒளி முழுவதையும் ஊடுருவ விட்டால் அதை பார்க்க முடியாது. அதே போல முழுக்க உள்வாங்கி விட்டாலும் பார்க்க முடியாது. இந்த இரண்டிலுமே ஒளி பொருள் மேலே பட்டு சிதறி நம் கண்களை வந்து அடையவில்லை. நல்ல காலமா இயற்கையில இந்த இரண்டு எக்ஸ்ட்ரீம்களிலும் விஷயங்கள் 100% ஆக இல்லை. பெரும்பாலும் கொஞ்சமாவது ஒளி சிதறி பொருளை நாம் பார்க்க முடிகிறது. ஆகவே இந்த ஒளிச் சிதறலை சரியாக புரிந்து கொள்வதும் மேலாளுவதுமே போட்டோகிராபில லைட்டிங் என்பதில் முக்கியமானது.

ஒரு எண்ணச் சோதனை மூலம் இதைச் சரியாக புரிஞ்சு கொள்ள முயற்சி செய்யலாம்.

ஒரு மேசை மேலே ஒரு தடிமனான வழ வழன்னு இருக்கிற சாம்பல் நிற காகிதத்தை கற்பனை செய்யுங்க. சாம்பல்(க்ரே)ன்னா இது மேலே பென்சில்ல எழுதினா தெரியணும். அதே சமயம் யாரும் அதை வெள்ளைன்னு நினைக்ககூடாது. சரியா?

உதாரணத்துக்கு இப்படி:

அதே போல ஒரு சாம்பல் நிறத் தகடு கற்பனைக்கு கொண்டு வாங்க. பேப்பர் அளவே அதுவும். அதே நிறம் வழ வழப்பு.

இப்படி இருக்கலாம்:

ரைட், அதே மாதிரி அளவு, நிறம், வழவழப்போட ஒரு செராமிக் டைல்-உம் கற்பனைக்கு வரட்டும்.

இப்படி:

இது மூணையும் (கற்பனை செய்து) பார்த்தா, ஒவ்வொண்ணும் ஏன் வித்தியாசமா இருக்கு? இதுல எதுவும் ஒளியை ஊடுருவ விடலை. (அதுக்குத்தான் காகிதம் தடிமனான்னு சொன்னோம்!). எல்லாமே ஒரே அளவு ஒளியை உள்வாங்கியது. அதனாலதான் எல்லாமே ஒரே நிறமா இருக்கு! சரிதானே? அப்ப இந்த மூன்றுமே ஒளியை வித்தியாசமா திருப்பி அனுப்புகின்றன. இது கற்பனையிலேயே எப்படித் தெரிஞ்சது? நாம் இந்த பதிவுகளில பார்க்கபோகிற எல்லாமே ஏற்கெனவே நம்ம தினசரி வாழ்க்கையில பார்த்தவைதான். அவற்றை இங்கே கவனத்துக்கு கொண்டு வரோம். அவ்வளோதான்.

(இன்னும் தெரிந்து கொள்வோம்)

காரமுந்திரி I.
காரமுந்திரி II

கார முந்திரி III
கார முந்திரி IV

-திவா
‘சித்திரம் பேசுதடி’
http://chitirampesuthati.blogspot.com/

அக்டோபர் 2011 - புகைப்படப் போட்டி அறிவிப்பு

2011-10-02T11:38:00.001+05:30

வணக்கம் நண்பர்களே.

வாழ்க்கைச் சக்கரம் எம்புட்டு வேகமா சுழலுதுங்கரது நான் சொல்லித்தான் உங்களுக்குத் தெரியணும்னு இல்லை. ஒரு காலத்துல வீட்ல ரேடியோ இருந்தா கெத்தான விஷயம். அப்பாலிக்கா கறுப்பு வெள்ளை டயனோரா டிவி இருந்தா பெரிய விஷயம். கலர் டிவி வந்து, ஃப்ளாட் ஸ்க்ரீன் வந்து, LCD/Plasma எல்லாம் வந்த வேகம் அசாத்யம். இப்ப 3D அது இதுன்னு அடுத்த கட்டத்துக்கு ஆயத்த மாயிட்டோம்.
என்னதான் புதுசு புதுசா தொழில்நுட்ப விஷயங்கள் வந்தாலும், ஞாயிற்றுக் கிழமை பிரியாணி சாப்பிட்டுட்டு, அந்த பழைய மர்ஃபி ரேடியோவில் கிர்ர்ர் சப்தத்தின் ஊடே, ஜானகியின் பழைய ராஜா பாடல்களை கேட்கும் சுகம் எந்த ஐப்-பாட்டிலும் கிடைப்பதில்லை.

விஷயத்துக்கு வாரேன். இந்த மாதப் போட்டிக்கான தலைப்பு, "மறந்து போனவை'.

அதாவது, புழக்கத்திலிருந்து மறைந்து போன, நாமெல்லாம் மறந்து போன விஷயங்க்ளை, தேடிப் பிடித்து போட்டிக்கு அனுப்ப வேண்டும்.

உதாரணத்துக்கு: மர்ஃபி ரேடியோ, சைக்கிள் டயனமோ, ஹால்டா டைப்ரைட்டர், கெரோஸின் அடுப்பு, இங்க் பேனா, வயர் சேரு, ஸ்லேட்டு பல்பம், சாக்பீஸு, ராந்தல் விளக்கு, எவெரெடி டார்ச்சு, மண் சட்டி, இத்யாதி இத்யாதி...

ஜமாய்ங்க.

போட்டி விதிமுறைகள் இங்கே.
படங்கள் வந்து சேர வேண்டிய கடைசித் தேதி 15-10-2011.

source: shameer

source: tmab2003

செப்டம்பர்'11 - போட்டி முடிவுகள்

2011-09-26T11:36:00.009+05:30

எல்லாருக்கும் வணக்கம்.

ஒரு வழியா இந்த மாதப் போட்டி முடிவுக்கு வந்தாச்சு. எதிர்பார்த்ததை விட நல்ல படங்கள் நிறைய இந்த மாத போட்டிக்கு வந்திருந்தன. இந்த மாதம் பதினைந்தாம் தேதி வரை எல்லாருக்கும் கண்ணில் காண்பதெல்லாம் எழுத்து வடிவத்திலும் எண் வடிவத்திலும் தெரிந்திருக்கும். காணும் பொருட்களை ஒரு புதிய பரிணாமத்தில் கண்டிருப்பீர்கள். போட்டி முடிந்தாலும் அது போல் காண்பவற்றை அழகாகப் படமாக்க முயலுங்கள்.

சரி... இனி முடிவுக்கு வருவோம்.

[முதலிடம் பெற்றதாக அறிவிக்கப்பட்ட தினேஷின் படம் விஜய் அக்கறையுடன் சுட்டிக்காட்டிய பின்னூட்டத்தின் பேரில் நீக்கப்படுகிறது. நன்றி விஜய்.]

புதிய வரிசைப்படி:
முதலிடம் - விஸ்வநாதன் (e)

ஆஹா சுப்பர்... சிறிய எழுத்து 'e'-ஐ அழகாகப் படமாக்கியிருக்கிறார். அந்த shallow DOF படத்தை மிக அழகாக்கி காட்டுகிறது. அதில் மெலிதாக தெரியும் அந்த கோடுகள் அழகு. வாழ்த்துகள் விஸ்வநாதன்.

இரண்டாமிடம் - சூர்யா (X)

-------------------------------------

சூர்யாவின் இந்த படம் பார்த்தவுடனே எனக்கு பிடித்து விட்டது. நேர்த்தியாக படம்பிடிப்பது கொஞ்சம் கடினம்தான்... இருந்தாலும் முயற்சியில் வெற்றி பெற்றிருக்கிறார். வாழ்த்துகள். அதில் தெரியும் X என்னவோ சிறிய அளவில் இருந்தாலும் அதுவே கருப்பொருள், நம் கண்கள் அதைத் தவிர வேறெங்கும் செல்வதில்லை. மேலேயும் கீழேயும் கொஞ்சம் க்ராப் செய்திருந்தால் இன்னும் நன்றாக இருந்திருக்கும்.

மூன்றாமிடம் - நித்தி(A)

பாரிஸ் நகரின் இந்த பிரபல கோபுரத்தை நேர்த்தியாக படம் பிடித்து அதில் 'A' என்ற எழுத்தை தெளிவாகப் பதிவாக்கியிருக்கிறார். கருப்பு வெள்ளை நல்ல தேர்வு. பின்னால் தெரியும் கட்டிடம் சிறிய அளவில் கவனச்சிதறல் ஏற்படுத்துகிறது. இருந்தாலும் அருமை. வாழ்த்துகள் நித்தி.

சிறப்புக் கவனம் பெற்ற படங்கள்:

ரவி (O)
மேலே வெட்டுப்பட்டுள்ள வளையங்களும் முழுமையாகஇருந்திருந்தால் நிச்சயம் முதல் முன்றில் வந்திருக்கும்.

சதீஷ் (O)
இன்னும் ஷார்ப்பா இருந்திருக்கலாம்.

போட்டியில் பங்கு பெற்ற அனைவருக்கும் எனது வாழ்த்துகள்.மற்ற படங்களின் மீதான எனது கருத்துகளை போட்டிக்கான ஆல்பத்தில் பதிந்துள்ளேன். கருத்துகள் யாவும் எனது மனதில்அந்த கணத்தில் தோன்றியவையே.

நன்றி.

‘என் நகரின் காட்சிகள்’-ரெட் ஃப்ரேம்ஸ் புகைப்படப் போட்டி 2011-பங்கு பெறுங்கள்.. பரிசுகளை அள்ளுங்கள்..

2011-09-24T13:28:00.008+05:30

'என் நகரின் காட்சிகள்'[Frames of My City] புகைப்படப்போட்டி 2011-யை அறிவித்து ரெட் ஃப்ரேம்ஸ் ஒரு பொன்னான வாய்ப்பை ஏற்படுத்திக் கொடுத்துள்ளது அனைத்து புகைப்பட ஆர்வலர்களுக்கும். நீங்கள் இத்துறையில் பெரிய தொழில் நுட்ப வல்லுநராக இருக்க வேண்டுமென்பதில்லை. வளர்ந்து வரும் கலைஞராயினும் சரி. பொழுது போக்குக்காக (amateurs) கேமராவும் கையுமாகச் சுற்றுபவராயினும் சரி. உங்கள் திறமையைக் காட்ட ஒரு நல்வாய்ப்பு.

நீங்கள் நேசிக்கும் ஒரு ஊரின் இடங்களையும், மக்களையும், அதன் கலாச்சாரம் மற்றும் பழக்க வழக்கங்களைப் பிரதிபலிக்கும் காட்சிகளையும் படமாக்க வேண்டும். அது பிறந்த ஊரோ, வசிக்கும் ஊரோ அல்லது குறிப்பிட்ட சிறப்புகளினால் மனதைப் பறிகொடுத்த ஊரோ எதுவாயினும் இருக்கலாம்.

படமாக்குவதில் அத்தனை அனுபவம் இல்லையே என்றெல்லாம் கவலைப் படாதீர்கள். வித்தியாசமான கேமரா பார்வையும் ரசனையுமே உங்களுக்குக் கை கொடுக்கப் போகின்றன. உற்சாகமாய் களமிறங்குங்கள்.

இனி கவனிக்க வேண்டிய சில விஷயங்கள்..

போட்டி அறிவிப்பான தேதி: 29 ஆகஸ்ட் 2011. ‘அடடா, கிட்டத்தட்ட ஒரு மாசம் ஓடிப் போயிருச்சே’ என உட்கார்ந்து விடாதீர்கள்.

போட்டி முடிவு தேதி: 29 அக்டோபர் 2011. ‘ஆகா, இன்னும் ஒரு மாசம் கிடக்கே’ எனத் துள்ளி எழுங்கள்:)!!

தேனீ போல சுறுசுறுப்பா படமெடுத்து, உடனுக்குடன் சமர்ப்பித்து வாரப் பரிசுகளையும் அள்ளப் பாருங்கள்!

தகுதி: பதினெட்டு வயதான அனைத்து இந்தியர்களும் கலந்து கொள்ளலாம்.

கலந்து கொள்ள கட்டணம் ஏதுமில்லை.

ஒருவர் பத்து படங்கள் மட்டுமே சமர்பிக்கலாம்.

மூன்று இலட்சம் ரூபாய் பெறுமானமுள்ள பரிசுகள் காத்திருக்கின்றன.

படங்களின் உரிமை முழுக்க முழுக்க எடுத்தவரையே சாரும். பரிசினை வெல்லும் பட்சத்தில் அவற்றை ரெட் ஃப்ரேம்ஸ் ப்ரோமோட் செய்ய உங்கள் அனுமதியைத் தர வேண்டும்.

படங்கள் வேறு போட்டிகளில் பரிசினை வென்றவையாக இருக்கக் கூடாது.

இரண்டு வருட காலத்துக்குள் எடுத்தவையாக இருக்க வேண்டியது அவசியம்.

சிலைகள், சிற்பங்கள், ஓவியங்கள் எனக் கலை சம்பந்தமானவற்றையும் காட்சிப் படுத்தலாம். ஆனால் சட்டத்துக்குப் புறம்பாக எடுத்தவையாக இருக்கக் கூடாது.

போட்டி பற்றிய விரிவான விவரங்களுக்கு: www.redframes.in/contest/

கவனமாக அத்தனை விதிமுறைகளையும் வாசித்திடுங்கள்.

மேலதிகத் தகவல்களுக்கு: fomc@redframes.in

பிறந்த மண்ணின் பெருமையை
வசிக்கும் ஊரின் அருமையை
பிடித்த ஊரின் அழகை
உலகுக்குச் சட்டமிட்டுக் காட்டுங்கள்!

பங்கு பெறவிருக்கும் PiT குடும்பத்தினரை PiT குழுமம் அன்புடன் வாழ்த்துகிறது:)!!

ALL THE BEST!!!
***

செப்'2011 போட்டி - டாப் 11 - தற்செயலான எண்கள்/எழுத்துக்கள்

2011-09-21T10:26:00.002+05:30

எல்லாருக்கும் வணக்கம்.

இந்த மாத போட்டியை அறிவிக்கும் போது எனக்கு சிறிது தயக்கம் இருந்தது. நம்ம ஆளுங்க இதுல நிறைய பங்கெடுப்பாங்களான்னு... ஆனா கலக்கிட்டீங்க மக்களே. நிறைய அற்புதமான படங்கள். கலந்து கொண்ட அனைவருக்கும் நமது குழுவின் சார்பில் நன்றியும் பாராட்டுகளும்.

இருந்தாலும் போட்டியின் முடிவுக்கு வரும் முன் ஒரு சில குறிப்பிட்ட படங்களை தேர்ந்தெடுக்க வேண்டுமில்லையா? அப்படி தேர்ந்தெடுக்கப்பட்ட படங்கள் இதோ கீழே.

எந்த வித வரிசைப்படியும் இல்லாமால்....


F&F (D)


Naanaani (X)

Narayanan M (W)


Nithi (A)

R.N.Suriya (X)

Ravi(O)

sathish(O)


Sathiya(Y)


Viswanathan (e)

எம். ரிஷான் ஷெரீப் (Y)


ஸ்ருதி(T)

இன்னொரு சிறிய அறிவிப்பு.... நமது குழுவிற்கு ஃபேஸ்புக் சமூக வளைத்தளத்தில் ஒரு பக்கம் தொடங்கப்பட்டுள்ளது. அதில் இணைந்து அவ்வப்போது அப்டேட்டுகளை கிடைக்கப்பெறுங்கள்.

https://www.facebook.com/photography.in.tamil

******

‘ஒளி’ வருவதும் போவதும்.. - Knowing Light - கார முந்திரி IV

2011-09-08T15:25:00.007+05:30

பொருட்கள் மீது வெளிச்சம் விழுகிறது இல்லையா? வெளிச்சம் என்கிறது பல ஃபோட்டான்கள் அடங்கிய ஓடை. (ஃபோட்டான்ன்னா ஒளித்துகள்) அனேகமா பொருட்கள் நகருவதில்லை. அதனால வெளிச்சம்தான் செயலோட இருக்கிறதா நாம நினைக்கிறோம். இப்படி நினைக்கிறதால ஒரு காட்சியை சரியா பார்க்க தவறிடறோம்.

பொருட்கள் மேலே ஃபோட்டான்கள் படும் போது 3 விஷயம் நடக்கலாம்.

1. ‘ரைட் போலாம்’ ன்னு ஃபோட்டான்களை அதோட வழியில அனுப்பிடலாம். இது ஒளி ஊடுருவல். -ட்ரான்ஸ்மிஷன்.

2. ‘வாவா’ன்னு உள்ள வாங்கி வெச்சுக்கலாம். உள் வாங்கல் - அப்சார்ப்ஷன்.

3. . ‘எனக்கு வேண்டாம்’ ன்னு திருப்பி அனுப்பிடலாம். ரிஃப்லெக்ஷன்.

ஒளி ஊடுருவல் ஆச்சுன்னா அந்த பொருளோட போட்டோவை பார்க்கிறதுல அர்த்தமில்லை. ஏன்னா ஒண்ணுமே தெரியாது! ஒளி ஒரு பொருள் மேலே பட்டு சிதறி நம் கண்ணுக்கு வந்தாதான் அந்த பொருள் தெரியவே தெரியும். ஊடுருவின ஒளி நேரா போய்கிட்டே இருந்தா நம் கண்ணுக்கு வராது - அது நம் கண் முன்னாடியே இருந்தால் ஒழிய! அதனால போட்டோ சம்பந்தமா இதுக்கு முக்கியத்துவம் இல்லைன்னு ஒதுக்கிடலாம்.

ஒளி ஊடுருவல் பொருளுக்கு செங்குத்தா இருந்தா அது பாட்டுக்கு நேரா போயிடுது. ஒரு கோணத்துல விழுந்தா அது வளைக்கப்படும். 'சற்றே தாமதித்து செல்லும் பிள்ளாய்' ன்னு தாமதப்படுத்தறதால பின்னால் வர போட்டான்கள் மோதி கீழே தள்ளி வளைக்கும் (இதான் ரிப்ராக்ஷன்) . இந்த பொருளை விட்டு வெளியேறும்போது திருப்பி பழைய வேகம் /திசையிலேயே போக ஆரம்பிச்சுடும். இப்படி வளையறதை வைத்துதான் காமிராவோட லென்ஸ் செய்து இருக்காங்கன்னு நமக்குத் தெரியுமே! இப்படி ஒளி வளையும் போதும் வெளியேறும்போதும் 100% அப்படியே நடந்து கொள்ளாது. கொஞ்சம் சிதறிடும். அதனாலதான் நாம் இந்த மாதிரி பொருட்களை பார்க்க முடியுது.

அதிகமாகவே சிதறும்படியா ஒளியை ஊடுருவ அனுமதிக்கற பொருட்கள் ஒளியை பல கோணங்களிலேயும் திருப்பி விட்டுடும். மெலிதான காகிதம், வெள்ளை கண்ணாடி (ப்ராஸ்டட் க்ளாஸ்),வெள்ளை அக்ரிலிக்; இதெல்லாம் இப்படி நடந்துக்கும். இது ஒளி மூலம் பத்தி யோசிக்கிறப்ப முக்கியம். ஒரு சின்ன ஓளி மூலம் (light source) இருந்தாலும் இப்படிப்பட்ட பொருட்களை இடையே சொருகி ஒளி மூலத்தை பெரிசாகவும், அதனால் மென்மையாகவும் (ஸாப்ட் லைட்) ஆக்கலாம். ஸ்ட்ரோப் லைட் முன்னால வைக்கிற வெள்ளை டிப்யூஷன் ஷீட், சூரியனை மறைக்கிற வெள்ளை மேகங்கள் எல்லாம் இதுக்கு உதாரணங்கள்:

போட்டோ எடுக்கப்படுகிற பொருள் இது போல ஒளியை மடக்குகிறது சாதாரணமா பிரச்சினை இல்லை.

ஒளியை உள் வாங்கலாம்ன்னு சொன்னோம் இல்லையா? உள்வாங்கப்பட்ட ஒளி திருப்பியும் பார்க்கக்கூடிய ஒளியா நமக்கு கிடைக்காது. வழக்கமா இது சூடாக மாறிடும். அதனால இதை போட்டோ எடுக்க முடியாது. பக்கத்திலேயே இருக்கிற ஒளியை உள்வாங்காத ஒரு பொருளோட ஒப்பிட்டு பார்த்தாதான் இதை 'பார்க்க' முடியும்! அதாவது வித்தியாசத்தை மட்டுமே பார்க்கலாம்.

கருப்பு பொருட்கள் நிறைய ஒளியை உள்வாங்கிடும் என்பதால அவற்றை போட்டோ எடுக்கறது கடினம்! கருப்பு வெல்வெட், ஃபர் இவற்றை போட்டோ எடுத்து பாருங்க!

மற்ற பொருட்கள் கொஞ்சம் ஒளியை உள்வாங்கி மற்றதை வெளியே விட்டு விடும். சிலதுன்னா சில அலைவரிசை ஒளியை. அதான் வண்ணம் என்பதும். ஊதா முதல் சிவப்பு வரை இருக்கிற அலை வரிசைகளில எதை திருப்பி அனுப்புதோ அந்த வண்ணமாக அந்த பொருளை நாம் தெரிஞ்சுக்கிறோம். பச்சை அலைவரிசை தவிர மீதி எல்லா அலை வரிசையையும் உள்வாங்கிட்டா பச்சை அலைவரிசை ஒளி மட்டும் வெளியே வரும்; பொருளும் பச்சையா தெரியும்.

அதே போல எவ்வளவு திருப்பி அனுப்புது என்பதை பொருத்து அந்த பொருளோட சாயலையும் நாம் தெரிஞ்சுக்கிறோம். அதிகம் திரும்பினா வெளிரியும்
குறைவா திரும்பினா அழுத்தமாவும் சொல்கிறோம்:

படம் 1 - # திவாஜி
பிற படங்கள்: # ராமலக்ஷ்மி

காரமுந்திரி I.
காரமுந்திரி II

கார முந்திரி III

-திவா
‘சித்திரம் பேசுதடி’
http://chitirampesuthati.blogspot.com/

செப்டம்பர்'11- போட்டி அறிவிப்பு

2011-09-02T14:26:00.005+05:30

எல்லாருக்கும் வணக்கம்.

நம்மைச் சுற்றிலும் எப்போதும் சில வடிவங்கள் மறைந்து கிடக்கும். மேகங்களை பார்த்து 'டேய் அங்க பாருடா சிங்கம் மாதிரி இருக்குல்ல', 'குதிரை மாதிரி இருக்குல்ல'.. இப்படி பல வடிவமைப்புகள் வெவ்வேறு பொருட்களில்/இடங்களில் விரவிக் கிடக்கின்றன. அது போல சில எழுத்து வடிவங்களும் எண் வடிவங்களும் காணக் கிடைக்கும்.

இந்த மாத போட்டி: "தற்செயலான எழுத்துகள்/எண்கள் "

போட்டி விதிமுறைகள் இங்கே.

படங்கள் வந்து சேர வேண்டிய கடைசித் தேதி 15-09-2011.

இந்த மாத போட்டிக்காக மட்டும் படத்தின் ஃபைல் நேம் முறையில் சிறிய மாற்றம் செய்யப்பட்டுள்ளது. அதாவது... படத்தின் ஃபைல் நேம், அனுப்பும் மடலின் சப்ஜெக்ட் இரண்டிலும் முதலில் படத்தை எடுத்தவர் பெயர், தொடர்ந்து அடைப்புக்குள் நீங்கள் படம் பிடித்திருக்கும் எழுத்து/எண் என்றிருக்குமாறு அனுப்புங்கள். எடுத்துக்காட்டாக: MQN(X).jpg என்றிருக்க வேண்டும்.

கீழுள்ள மாதிரி படங்களை பார்த்தாலே உங்களுக்கு போட்டி என்னவென்று விளங்கிவிடும். இருந்தாலும், சில விஷயங்களை தெளிவு படுத்துகிறேன்.

நீங்கள் குறிப்பிட விரும்பும் எண்/எழுத்து முதன்மை பொருளாக(main subject) இருக்க வேண்டும். படத்தில் எங்கே ஒரு மூலையில் 10% அளவில் மட்டும் அந்த எழுத்து வடிவம் படமாக்கப் பட்டிருக்கக் கூடாது. முதன்மை பொருளாக இருக்க வேண்டும்.

நேரடியாக ஒரு எண்ணோ/எழுத்தோ எழுதப்பட்டிருப்பதை படமாக்க கூடாது. அதவாது, எங்கேயோ ஒரு 'D' என்று எழுதப்பட்டிருப்பதை படமாக்கக் கூடாது. அது போன்ற வடிவமைப்புடன் உள்ளதைத்தான் படமாக்க வேண்டும்.
ஒரு எழுத்தை தலைகீழாக படமாக்க நேரிட்டால், பரவாயில்லை படம் பிடியுங்கள், பின்னால் பிற்தயாரிப்பில் அதை rotate செய்து அனுப்பி விடுங்கள். பார்வையாளரை தலை சுற்ற வைக்காதீர்கள். :)))
தமிழ் எழுத்துக்களாக (ஆங்கிலம் & தமிழ் மட்டும்) இருந்தாலும் பரவாயில்லை. வேறு மொழி வேண்டாம் ப்ளீஸ் (எனக்குத் தெரியாது... அதனால் என்னால் கண்டு பிடிப்பது சிரமம்).

மாதிரி படங்கள்.

H - (நன்றி ராமலஷ்மி)

W - (நன்றி ராமலஷ்மி)
இப்படத்தில் கழுத்தில் பாம்பு ‘U' ஆகவும் கையில் S ஆகவும் தெரிந்தாலும் அழுத்தமாக எழுத்தைச் சொல்வது w. எனவே மல்டிபிள் எழுத்துள்ள படமாயினும் நீங்கள் காட்ட விரும்புவதையே அடைப்புக்குள் குறிப்பிடுங்கள்.


T டிப்ஸ்: பறவைகளில் 'S' நிறையக் காணலாம். கட்டிடங்களில், 'D' 'W' 'U' 'Z' ஆகிய எழுத்துகள் காணக் கிடைக்கும். சாலை வளைவுகளில் 'U' 'C' காணலாம். மரக்கிளைகளில், 'V' 'W' 'X' 'Y' போன்றவை கிடைக்கும். மேலும், இங்கே இது போல பல படங்கள் உங்கள் ஐடியாவுக்கு. ஆக..... இந்த மாத போட்டி உங்களுக்கு தெளிவாய் விளங்கியிருக்கும் என்று நம்புகிறேன். சந்தேகங்களை பின்னூட்டத்தில் தெரிவிக்கவும். நடுவர்: MQN போட்டிக்குப் படங்களை அனுப்பி கலக்குங்க மக்களே. :)

2011 ஆகஸ்ட் மாத போட்டி முடிவுகள்

2011-08-29T21:57:00.010+05:30

வணக்கம் மக்கா,
இந்த மாத போட்டியில் முதல் மூன்று இடங்களை பிடித்த படங்கள் கீழே,

மூன்றாம் இடம்
காயத்ரி

இரண்டாம் இடம்
வருண்

முதல் இடத்தில் இருப்பது
தமிழ்செல்வி

வெற்றி பெற்றவர்களுக்கு என்னுடைய வாழ்த்துக்கள் !

போட்டி படங்களுக்கான எனது கருத்துக்களை போட்டியின் ஆல்பத்தில் சேர்த்துள்ளேன்.

பங்கு பெற்ற அனைவருக்கும் நன்றி !!!

ஆகஸ்ட் 2011 போட்டி - முதல் சுற்றுக்கு முன்னேறிய படங்கள்

2011-08-25T21:33:00.018+05:30

வணக்கம் மக்கா,

சோகமான நிகழ்வுகளை படம் எடுக்க வைத்ததற்காக மன்னிக்கவும். போட்டியில் பங்குபெற்ற அனைவருக்கும் நன்றி !

மாதிரி படங்கள் பற்றி பதிவு செய்த ராமலட்சுமி அவர்களுக்கு நன்றி !

அடுத்த சுற்றுக்கு முன்னேறிய படங்கள் கிழே. அவர்களுக்கு வாழ்த்துகள்.

அவினாஷ்மணி

காயத்ரி

சுரேஷ்

தமிழ்செல்வி

ஜேம்ஸ் வசந்த்

மதன்லால்ஸ்

முஹமெத்ரபி

R.N.சூர்யா

வானம்

வருண்

அனைத்து படங்களுக்குமான என்னுடைய கருத்துகளை பதிவாக வெளியிடுகிறேன். போட்டி முடிவுடன் உங்களை விரைவில் சந்திக்கிறேன்.

நிற வேறுபாடு - Knowing Light - காரமுந்திரி III

2011-08-13T07:51:00.002+05:30

அடுத்து நாம் பார்க்கக்கூடியது கான்ட்ராஸ்ட் என்கிற நிற வேறுபாடு.

இந்த வேறுபாடு எங்கிருந்து வரும்? வெளிச்சம் பொருள் மேல ஒரே பக்கத்தில் இருந்து ஒரே கோணத்தில் விழும்போது வரும். இப்படி விழும்போது பொருளோட ஒரு பக்கம் அதிக வெளிச்சமும் மறு பக்கம் குறைவாகவும் இருக்கும். இதான் வேறுபாடு. பொருள் மேலே எல்லா கோணங்களிலேயும் வெளிச்சம் விழுந்தா அது குறைவான – லோ- கான்ட்ராஸ்ட்.

இப்படி அதிக கான்ட்ராஸ்ட் தரும் வெளிச்சத்தை ஹை கான்ட்ராஸ்ட் உள்ள ஒளி மூலம் என்றும் குறைவாக கான்ட்ராஸ்ட் தரும் வெளிச்சத்தை லோ கான்ட்ராஸ்ட் உள்ள ஒளி மூலம் என்றும் சொல்வோம்.

எப்படி இது அதிகம் குறைவுன்னு கண்டுபிடிக்கிறது? சுலபம். அதிக கான்ட்ராஸ்ட் இருந்தா நிழல் விழும். அந்த நிழல் கோடு வரஞ்சு இதோ பார் இது வரை இருக்குன்னு சொல்கிற அளவு துல்லியமா இருக்கும்.அஹா! இப்ப புரியுதா ஏன் இதைப்பத்தி கவலை படுகிறோம்ன்னு? இப்படிப்பட்ட நிழல் ஹார்ட் ஷேடோ ன்னும் குறைவான கான்ட்ராஸ்ட் இருக்கும் போது கிடைக்கும் நிழலை ஸாப்ட் ஷேடோ ன்னும் சொல்கிறாங்க. குறைவான துல்லியத்தோட எங்கே ஆரம்பிக்கிறது எங்கே முடியதுன்னு தெரியாத மாதிரி இருக்கிறது ஸாப்ட் ஷேடோன்னு சொல்ல வேண்டிய அவசியம் இல்லைதானே?

கோடை காலம் உச்சி வெயில் மண்டையை பொளக்குது. மேகமே இல்லை. இப்ப சூரியன் ஹை கான்ட்ராஸ்ட் மூலம். ஹார்ட் ஷேடோதான் கிடைக்கும். இதே பனிக்காலத்தில சூரியனையே காணாம மேகங்கள் சூழ்ந்துகிட்டு இருக்கிறப்ப கிடைப்பது லோ கான்ட்ராஸ்ட் ஒளி மூலம். சூரிய ஒளி மேகங்களிடையே புகுந்து சிதறி எல்லாப்பக்கங்களிலேந்தும் கீழே வரும் இல்லையா? இதனால் கிடைக்கக்கூடிய நிழல் ஸாப்ட் ஷேடோ:இந்த ஹார்ட் ஸாப்ட் என்கிறது நிழலோட விளிம்பை பொறுத்துத்தான் சொல்கிறோம். நிழல் எவ்வளோ கருப்பு என்கிறதை பொறுத்து இல்லைங்க. நிழல் எவ்வளோ கருப்பு என்கிறது பொருளோட பரப்பு என்ன மாதிரி இருக்கு, பக்கத்திலே இருக்கிற பொருட்கள் மேலே வெளிச்சம் பட்டு இங்கே சிதறுதான்னு பல மத்த விஷயங்களை பொறுத்து இருக்கு.

பொதுவா சின்ன இடத்திலிருந்து வரும் வெளிச்சம் அதிக கான்ட்ராஸ்ட் உம் பெரிய பரப்பில் இருந்து வரும் வெளிச்சம் குறைவான கான்ட்ராஸ்ட் உம் தரும். இவற்றில சில சாதனங்களைப் பொருத்தி கான்ட்ராஸ்ட் ஐ மாத்தவும் முடியும்.

இப்படி எல்லாம் இருந்தாலும் பிஸ்தா போட்டோகிராபர்கள் குறைவான கான்ட்ராஸ்ட் இருக்கிற இடத்தில அதிக கான்ட்ராஸ்டையும் அதிக கான்ட்ராஸ்ட் இருக்கிற இடத்தில குறைவாயும் காட்டுவாங்க. எல்லாம் தொழில் ரகசியம்!

ஒரு படத்தை எப்படி கம்போஸ் செய்யறது, எவ்வளோ எக்ஸ்போசர் கொடுக்கிறது போல பல விஷயங்கள் இருக்காம்! மேலும் எக்ஸ்போசர் கொடுத்தா சிலதுல கான்ட்ராஸ்ட் அதிகமாகும், சிலதுல குறையுமாம்.

எது எப்படியானாலும் கணினி மென்பொருளை பயன்படுத்தி பூந்து விளையாடிடலாம் இப்படி:

படங்கள்: # ராமலக்ஷ்மி

காரமுந்திரி I.
காரமுந்திரி II

-திவா
‘சித்திரம் பேசுதடி’
http://chitirampesuthati.blogspot.com/

குட்டி உலகம் சிருஷ்டிக்கலாம் நாமே.. - போலார் பனரோமா எஃபெக்ட்

2011-08-11T08:44:00.000+05:30

'யாருமில்லாத தீவொன்று வேண்டும்...' இப்பிடி யாராவது நெனச்சிங்கன்ன, உங்களுக்கு இந்த பதிவு பிரயோசனமாக இருக்கும். ஏன்னா எப்பிடி குட்டி உலகம் உருவாக்கலமாங்கிறதான் பாடம். அதுவும் அஞ்சே நிமிசத்துல. உங்கட்ட இருக்க வேண்டியதெல்லாம்.
1. காமரா
2. காம்பியூட்டர்
3. ஃபோட்டோஃசொப் / கிம்ஃப்

அதுக்கு முன்னாடி, பனரோமா (Panorama) பத்தி கொஞ்சம் தெரிச்சுக்குவம். பனரோமா என்பது செந்தமிழில் அகலப்பரப்பு. காட்சிகள அகலமா ஃபோட்டோ புடிச்சா அதான் பனரோமா. இத பனரோமா வியூ (Panorama View/அகலப்பரப்பு காட்சி) என்டும் சொல்லாம். பொதுவாக 4 ஷாட்ஸ் மூலமா இத எடுக்கலாம். இது சொஞ்சம் சிரமமான வேலதான்.

பனரோமா சாம்பிளுக்கு இந்தப் படம்

பனரோமா ஃபோட்டோ புடிக்க எனக்கு நேரமில்ல என்டு நெனச்சிங்கன்னா உங்களுக்கு ஒரு சுலபமான வழி.

சாம்பிளுக்கு....

சாதாரண ஃபோட்டோ ( # ராமலக்ஷ்மி)

பனரோமாவுக்கு பொருத்தமாக Crop செய்யப்பட்டது.

குட்டி உலகம் ரெடி!

குட்டி உலகத்துக்கான ஃபோட்டோவை தெரிவு செய்தல்:

2:1 என்ற விகிதப்படி உள்ள காட்சிகள் சிறப்பானவை (அல்லது 2:1 என்ற விகிதப்படி Crop செய்யப்பட்ட ஃபோட்டோ). எவ்வளவுக்கு அகலம் அதிகமாக இருக்குதோ, அவ்வளவுக்கு சிறப்பான 'குட்டி உலகம்' கிடைக்கும்.
ஃபோட்டோவின் கீழ்ப்பகுதியில் (25% அல்லது குறைவாக) மண் தரை, நீர் இருப்பது சிறந்தது. ஏன்னா இதுதான் நடுப்பகுதியாக மாறும்.
ஃபோட்டோவின் மேற்பகுதியில் (25% அல்லது குறைவாக) ஆகாயம், மேகம் இருப்பது சிறந்தது.
வலப்பக்கமும் இடப்பக்கமும் முடிந்தளவு ஒரே மாதிரியாக (நிறம், காட்சி, காட்சியின் உயரம்) இருப்பது சிறந்த காட்சியை உருவாக்கும். ஏன்னா வல, இட பக்கங்கள் ஒன்னா சந்திக்கும்.
காட்சியின் கிடையான (horizontal) எல்லைகள் உயர்ந்து தாழ்வாக இருக்காமல் சமமாக இருக்க வேண்டும். இல்லன்னா 'குட்டி உலகம்' பிளந்ததுபோல் காட்சியளிக்கும்.

உங்க பனரோமா ஃபோட்டோவை ஃபோட்டோஃசொப் / கிம்ஃப் இல் திறந்து கொள்ளுங்கள். அல்லது பனரோமாவுக்கு ஏற்ற மாதிரி Crop செய்து கொள்ளுங்கள்.

படிமுறை 1:
ஃபோட்டோவை சற்சதுரமாக மாற்றுங்கள்.

மெனுவில் Image> Image Size
Constrain Proportions என்பதன் √ அடையாளத்தை நீக்கிவிடுங்கள்.
"Width" ற்கு ஏற்றவாறு "Height" யை மாற்றிவிடுங்கள். Ex: 1800x1800

படிமுறை 2:
ஃபோட்டோவை தலைகீழாக மாற்றுங்கள்.

மெனுவில் Image> Rotate Canvas>180^o(எதிர்மறையான குட்டி உலகம் தேவையென்றால் படத்தை தலைகீழாக மாற்றத் தேவையில்லை.)

படிமுறை 3:
ஃபோட்டோவிற்கு ஃபோலார் எஃபெக்ட்டை அப்ளை செய்தல்

மெனுவில் Filter > Distort > Polar Coordinates (கிம்ப்பில் Filters > Distorts > Polar Coords.)
“Rectangular to Polar”தெரிவு செய்யப்பட்டிருப்பதை நிச்சயப்படுத்திக் கொள்ளுங்கள்.

90% ரெடி!

படிமுறை 4:
இனி செய்ய வேண்டியதெல்லாம், படத்தை மெருகூட்ட வேண்டியதே. அங்காங்கே இருக்கும் புள்ளிகளை அகற்றி வல, இட பங்கங்கள் பொருந்தும் இடத்தில் உள்ள செயற்கைத்தன்மையினை அகற்ற வேண்டியதுதான். Clone Stamp Tool, Smudge Tool என்பன இதற்குப் பயன்படும்.

(படம்: ஜெருசலேம், இஸ்ராயல்)

குட்டி உலகம் ரெடி!

செலக்டிவ் கலரிங் செய்து அசத்துவோமா? / Selective Coloring in GIMP

2011-08-08T08:51:00.006+05:30

PIT வாசகர்களுக்கு வணக்கம், பொதுவாக புகைப்படக்கலைஞர்கள் பெரும்பாலோனோர்கள் தங்களது படத்தொகுப்புகளில் சிலப்படங்களை "Selective coloring" காக கொடுக்க நினைப்பார்கள். "Selective Coloring" என்பது முழுபடத்தையும் கருப்பு வெள்ளையாக மாற்றிவிட்டு படத்தின் ஒரு குறிப்பிட்ட பகுதியை மட்டும் வண்ணமாக காட்டி பார்ப்பவரின் கவனத்தை ஈர்த்துவிடும் ஓர் நுட்பமாகும். சமீபத்தில் PIT குழுவை சேர்ந்த ராமலக்ஷ்மி என்னிடம் தொடர்புகொண்டு GIMP-ல் இந்த "Selective coloring" செய்வது பற்றிக் கேட்டார்கள். அவர்களுக்கு மட்டுமின்றி PIT வாசகர்களுக்கும் பயன்படட்டுமே என இக்கட்டுரையைத் தருகிறேன். பொதுவாக GIMPலும் போட்டோஷாப்பிலும் இதனை Eraser டூலைக்கொண்டே தான் பெரும்பாலோனோர்கள் செய்வார்கள். இந்த Eraser டூலை கொண்டு "selective coloring" செய்வதை ஏற்கனவே PIT தளத்தில் கட்டுரையாக இங்கே தந்திருக்கிறார்கள். ஆனால் கட்டுரையின் முடிவில் Layer mask கொண்டு அழிப்பது Homework என கட்டுரையை முடித்திருக்கிறார்கள். அந்த Homework ஐ நான் இன்று Class Workகாக உங்களுக்காக தொடருகிறேன்.

நான் இந்த Layer mask பயன்படுத்திதான் போட்டோஷாப் & கிம்பில் "Selective coloring" செய்வேன். Layer mask கின் அடிப்படை தத்துவத்தை நீங்கள் புரிந்துகொண்டால் எளிமையாக Layer mask நுட்பத்தை தேவையான சந்தர்பங்களில் எளிமையாக‌ பயன்படுத்திக்கொள்ளலாம். இது நான் கடைபிடிக்கும் கோட்பாடு. Layer maskகின் அடிப்படை தத்துவம் "black conceals, white reveals" இதனை இன்று முதல் நன்றாக மனதில் பதியவைத்துக்கொள்ளுங்கள்.

சரி கட்டுரைக்கு போகலாம். முதலில் உங்களது படத்தை "GIMP"இல் திறந்துகொள்ளவும்.இப்போது உங்களது "Background" லேயரை Duplicate செய்யவேண்டும். இதற்கு லேயர் பேலட்டில் இருக்கும் "Copy bacground layer" ஐகானை கிளிக்செய்யவும் அல்லது பேக்கிரவுண்டு இமேஜ் லேயரை வலது கிளிக் செய்து "Duplicate background layer" என்பதனை தேர்ந்தெடுக்கவும்.

இப்போது Duplicate செய்த லேயரை நாம் கருப்பு வெள்ளையாக மாற்றவேண்டும் இதற்கு Color>Hue&Saturation அழுத்தவும். இப்போது தோன்றும் டயலாக் பாக்ஸில் Saturation இன் மதிப்பை -100 என தரவும். இப்போது உங்களது படம் கருப்பு வெள்ளையாக மாற்றப்பட்டிருக்கும்.

குறிப்பு : இந்த Hue & Saturation க்கு பதிலாக நீங்கள் Color>Desaturate ம் பயன்படுத்தலாம். இரண்டிற்க்கும் ரிசல்ட் ஒன்றுதான்.
இனி இந்த கருப்பு வெள்ளை லேயருக்கு Layer mask சேர்ப்போம். இதற்கு கருப்பு வெள்ளை லேயரை வலது கிளிக் செய்து "Add Layer Mask" என்பதனை தேர்ந்தெடுக்கவும்.

இப்போது தோன்றும் டயலாக் பாக்ஸில் வெள்ளை நிறத்தை தேர்வு செய்து ஓகே செய்யவும்.

இப்போது உங்களது கருப்பு வெள்ளை லேயரில் Layer mask சேர்க்கப்பட்டிருக்கும். இனி உங்களது டூல் பாக்ஸில் உங்களது Foreground மற்றும் Background ன் நிறங்கள் முறையே கருப்பு & வெள்ளையாக மாற்றவும். இதற்க்கு உங்களது விசைபலகையில் "D" ஐ அழுத்தவும். (லேயர் மாஸ்கின் தத்துவத்தை மீண்டும் ஞாபகத்திற்கு கொண்டு வாருங்கள்).

இனி பிரஷ் டூலை தேர்வு செய்யவும். பிரஷின் அளவை உங்களது விருப்பத்திற்க்கு வைத்துக்கொள்ளவும்.

இனி படத்தில் எந்த பகுதியை வண்ணமாக காட்டவேண்டுமோ அந்த பகுதிகளை பிரஷ் செய்யவும். இப்போது நீங்கள் பிரஷ் செய்த இடங்கள் எல்லாம் வண்ணமாக மாறியிருக்கும்.பிரஷ் செய்யும் போது கூடுமானவரை படத்தை Zoom செய்துகொள்ளவும் பின் அதற்கேற்றார்போல பிரஷ் அளவை தீர்மானித்துக்கொள்ளவும்.
இங்கே தான் ஒரு விஷயம் கவனிக்கபடவேண்டும். நாம் என்னதான் கவனித்து பிரஷ் செய்தாலும் உங்களது ஆப்ஜக்டையும் தாண்டி வண்ணம் வெளியேசென்று படத்தை கெடுத்துவிடும். இது பெரும்பாலும் எல்லோருக்கும் ஏற்படுவதே பார்க்க கீழேயுள்ள படம்:

சரி இதற்கெல்லாம் வழி செய்யத்தானே நாம் லேயர் மாஸ்க்கை ஏற்படுத்தியிருக்கிறோம். அதாவது "black conceals, white reveals" இல்லையா எனவே உங்களது டூல் பாக்ஸில் இருக்கும் Foreground & Background வண்ணத்தை முறையே வெள்ளை & கருப்பு என உல்டா செய்துகொள்ளவும். இதற்க்கு தட்டச்சு பலகையில் இருக்கும் "X" ஐ அழுத்தவும்.

இப்போது மீண்டும் ஒருமுறை பிரஷ் டூலை தேர்வு செய்து நீங்கள் தவறு செய்த இடத்தில் பிரஷ் செய்யுங்கள். வண்ணம் கருப்பு வெள்ளையாக மாறுவதை காணலாம்.பிரஷ் அளவை உங்கள் தேவைக்கு தகுந்தவாறு செட் செய்து கொண்டு பணிபுரிந்தால் நல்ல ரிசல்ட் கிடைக்கும்.

Final image:

ஆக இதுதான் Layer maskன் தத்துவம் இதனை புரிந்துகொண்டால் புகைப்பட எடிடிங்கில் பல இடங்களில் பேருதவியாக இருக்கும். இனி PIT வாசகர்களாகிய நீங்களும் "Selective coloring" இல் அசத்துவீர்கள் என நம்புகிறேன்.

குறிப்பு: நான் என்னுடைய கணினியில் இயங்குதளம் மற்றும் மென்பொருட்களை பிரெஞ்சு மொழியில் பயன்படுத்துவதால் என்னுடைய Screen shot கள் பிரெஞ்சு மொழியில் இருக்கிறது என்பதை வாசகர்களுக்கு தெரிவித்துக்கொள்கிறேன்.
***
Lesson By ‘Nithi Clicks’
http://www.flickr.com/photos/nithiclicks/

ஆகஸ்ட் போட்டி - மாதிரிப் படங்கள்

2011-08-05T17:17:00.007+05:30

இந்த மாதத்திற்கான தலைப்பு - சோகம் :( அப்படின்னு அறிவிச்ச நடுவர் நாதஸ் அழகாய்ச் சொல்லிட்டார்:
“வாழ்க்கை பயணம் தொடர்ந்து சீராகச் செல்லாது. சில தடுமாற்றங்கள், கவலைகள் இடையிடையே தோன்றும். அத்தகைய உணர்வுகளை இந்த வாரம் படம் எடுக்கப்போகின்றோம். உங்களுடைய படம் இயலாமை, தோல்வி, விரக்தி, பரிதவிப்பு போன்ற உணர்வுகளை வெளிபடுத்தலாம்.”

"மாதிரிப் படங்கள் எங்கே" என உரிமைக் குரல் கொடுத்துப் போன கோமா, ஷ்ராவ்யன் ஆகியோருக்காகவும், தலைப்புக்காகக் காமிராவை கையிலெடுக்க இருக்கும் ஏனைய பிறருக்காகவும்...

#1 ராமலக்ஷ்மி

#2 ஜீவ்ஸ்

#3 கருவாயன்

#4 கருவாயன்

#5 ராமலக்ஷ்மி
சோகமென்றாலே வயசானவங்கதானா அப்படின்னு கேட்கவோ, கேட்காமலே ஒரு முடிவு கட்டவோ செஞ்சுடாதீங்க. வாழ்வின் விளிம்பில் ஒரு வித சோகத்தை விரக்தியைப் பரப்புகிற மாதிரியாக அமைஞ்சு போன படங்கள் இவை. எல்லாமே உடல்மொழியால் உணர்வை உணர்த்துவதாய் அமைஞ்சிருக்கு இங்கே.

ஆனா உணர்வை வெளிப்படுத்தும் சக்தி கண்களுக்கே அதிகம் என்பதை நம்மாலே மறுக்க முடியுமா? இதோ கீழுள்ள இந்தச் சிறுவனின் கண்ணில் தேங்கி நிற்கும் ஓராயிரம் கேள்விகளில் ஒன்றுக்குக் கூட நம்மிடம் விடை இல்லை:(!
#6 ஜீவ்ஸ்

இந்தக் கண்களை நேருக்கு நேர் நம்மால சந்திக்க முடியுதா?
#7 ராமலக்ஷ்மி

காட்டு ராஜாவைக் கட்டிப் போட்டோ அதன் கண்களில் உற்சாகமா வழியும்:(?
#8 ராமலக்ஷ்மி

இதுபோல பல விலங்குகள், குறிப்பா நாய்கள், மாடுகள் தனிமையில் சோகமாப் பார்த்தபடி இருக்கும். ஐந்தறிவு விலங்குகளுக்கும் உணர்வுகள் இருக்கே. கவனிச்சுப் பாருங்க.

தனிமையிலே குழந்தைகள் கூடதான் dull-ஆக bored-ஆக உணருவாங்க. பாருங்க இந்தப் பையனை. அம்மா ‘இப்ப விளையாடப் போகாதே. படி உட்கார்ந்து’ன்னு சொல்லிட்டாங்களோ:)?

#9 ஜீவ்ஸ்

இப்போ இலையுதிர்காலம். இந்தத் தலைப்பு அறிவிப்பான நாளுல காருல போயிட்டிருக்கும் போது பல இடங்களில் ஒத்த இலை கூட இல்லாத மரங்களைப் பார்த்தேன். அது கூட ஒரு சோகம்தான். நெடுஞ்சாலை என்பதால் நிறுத்தி எடுக்க முடியலை. ஆனா என்ன அழகான கோணங்களில் எடுக்கலாம்னு மனசு மட்டும் கணக்குப் போட்டுச்சு. அப்படியான படத்தைக் கொடுத்துட்டு ‘நீங்க சொன்னீங்கன்னு எடுத்தனே. மொதப் பத்துக்குள்ள கூட வரலியே’ன்னுல்லாம் கேட்கப்படாது:))! கட்டிடப் பின்னணியில்லாமல் வெண்மேகம் சூழ்ந்த வானோ, நிர்மலமான நீல ஆகாயமோ மட்டுமே பின்னணியா வருமாறு லோ ஆங்கிளில் எடுத்தா நல்லாருக்கும். லைட்டிங்கும் சோகமான மூடை கொண்டு வருமாறு இருக்கணும்.

இது ஒரு உதாரணத்துக்குதான். உங்க கற்பனையைத் தட்டி விடுங்க. சோகத்தை எப்படி படமெடுக்க என சோர்வாயிடாதீங்க. பாருங்க மொட்ட மரம் சோகமா தெரிஞ்சாலும், இன்னும் சில நாளுல துளிர்த்துத் தளிர்விட்டுப் பூத்துக் குலுங்கிடும். அது போலதான். எந்த உணர்வும் நிரந்தரமில்ல. எல்லாம் மாறி மாறி வருவதுதானே வாழ்க்கை. ஹி.. நடுவர் சொன்ன அதே பாயிண்ட்ல முடிச்சுக்கறேன்:)!

2011 ஆகஸ்ட் மாத போட்டி அறிவிப்பு

2011-08-01T20:56:00.006+05:30

வணக்கம் மக்கா,

வாழ்க்கை பயணம் தொடர்ந்து சீராக செல்லாது. சில தடுமாற்றங்கள், கவலைகள் இடையிடையே தோன்றும். அத்தகைய உணர்வுகளை இந்த வாரம் படம் எடுக்கப்போகின்றோம் .

இந்த மாதத்திற்கான தலைப்பு - சோகம் :(

உங்களுடைய படம் இயலாமை, தோல்வி, விரக்தி, பரிதவிப்பு போன்ற உணர்வுகளை வெளிபடுத்தலாம்

போட்டிக்கான விதிமுறைகள் இங்கே.

படம் அனுப்ப வேண்டிய கடைசி தேதி 15-08-2011

நன்றி
நாதஸ்

கூல் என்கிறது ஹாட்! ஹாட் என்கிறது கூல்! - Knowing Light - காரமுந்திரி II

2011-07-28T13:24:00.011+05:30

கூல் என்கிறது ஹாட்! ஹாட் என்கிறது கூல்!

நாம் பார்க்கிற சூரியனும் வெளிச்சம்தான்; வெல்டிங்செய்கிறபோது பார்க்கிறதும் வெளிச்சம்தான். நிலா ஒளியும் வெளிச்சம்தான்.

ஆனா போட்டோ கிராபர்களுக்கு சும்மா வெளிச்சம் ன்னு சொன்னா போதாது. இன்னும் டெக்னிகலா சொல்லனும். எங்கே வெளிச்சத்தை நம்மால கட்டுப்படுத்த முடியாதோ - திறந்த புல்வெளி, இயற்கையான அரங்கு இப்படி - அங்கே எல்லாம் இப்படி டெக்னிகலா ஒளியை ஆராய்ஞ்சாதான் போட்டோ எடுக்கலாமா இல்லை சரியான சூழ்நிலை வரும் வரை காத்திருக்கணுமான்னு முடிவு செய்யலாம்.

இதுக்கு அவங்க பயன் படுத்தற டெக் வார்த்தைகள்:

ப்ரைட்னஸ், கலர், கான்ட்ராஸ்ட்.

அதாவது ஒளி அளவு, வண்ணம், வேறுபாடு.

ஒளி அளவை பார்க்கலாம்.

குறைந்த பட்சமா ஓரளவாவது வெளிச்சம் இருக்கணும். இல்லையானால் போட்டோ எடுக்க முடியாது. அதிகமா இருந்தா இன்னும் நல்ல படம் எடுக்க முடியலாம். அபெர்சரை இன்னும் சின்னதா வெச்சுக்கலாம்; ஷட்டர் வேகத்தை கூட்டிக்கலாம். முன்ன்ன்ன்ன்ன்ன்ன்ன்ன்ன் காலத்துல ஸ்லோ பில்ம் ன்னு உண்டு. அதை பயன்படுத்த முடியும். பில்மை விடுங்க! நல்ல வெளிச்சம் இருந்தா விடியோகிராபர்கள் சின்ன அபெர்சரை பயன்படுத்தி நகர் படம் எடுக்கலாம். அப்படி எடுக்கும் போது வண்ணங்கள் இன்னும் நல்லா வரும். படமும் கூர்மையா இருக்கும். விடியோ நாய்ஸ் (சிதறல்) குறைவா இருக்கும்.

ஆனா வெளிச்சம் குறைவா இருந்தா ஒண்ணும் செய்ய முடியாது. யாராவது கலைக்கண்ணோட எடுக்கிறேண்னு எடுத்தாத்தான் குறைவான வெளிச்சத்துக்கு பயன் உண்டு.

இந்த வண்ணம் என்கிறது என்னன்னு எல்லாருக்கும் தெரியும். எந்த வண்ண வெளிச்சத்திலேயும் படம் எடுக்கலாம். அது கலை மெருகை கூட்டலாம். பலரும் எடுப்பது '' வெள்ளை'' வெளிச்சத்திலேதான். வெள்ளை வெளிச்சம் என்பதென்ன? முக்கிய வண்ணங்களான சிவப்பு, நீலம், பச்சை மூணும் போதிய அளவு இருந்துட்டா நம் மூளை அதை வெள்ளைன்னு சொல்லிடும். ஆனா எப்பவும் ஏதோ ஒரு வண்ணம் அதிகமாகவே இருக்கும். டிஜிட்டல் காமிராவும் இதே போல அட்ஜஸ்ட் பண்ணும், ஆனா அவ்வளோ சரியா செய்யாது. அதனால சீரியஸா போட்டோ எடுக்கிறவங்க என்னமாதிரி வெள்ளை வெளிச்சம் ன்னு ஆராயணும். இதுக்கு பிசிக்ஸ் வாத்தியார்கள்கிட்டேந்து கடன் வாங்கி வெப்ப அளவாகவே இதை சொல்கிறாங்க- கெல்வின்.

இதென்ன வெப்ப அளவு?

ஒரு பொருளை வெற்றிடத்தில வெச்சு போதிய அளவு சூடாக்கினா அது ஒளிரும். இந்த ஒளி அளவைதான் வெப்ப அளவைத்தான் பார்க்கிறோம். 10,000 டிகிரி கெல்வின்ல - அதிக வெப்பத்தில நீல வண்ணம் அதிகமா இருக்கும். போட்டோகிராபர்கள் இதை கூல் என்கிறாங்க! 2,000 டிகிரி கெல்வின்ல - குறைந்த வெப்பத்தில சிவப்பு வண்ணம் அதிகமா இருக்கும். இதை வார்ம் என்கிறாங்க!

உண்மையில் இது புரிஞ்சுக்ககூடியதுதான். வெல்டர்களுக்கு தெரியும். அவங்க வெல்ட் பண்னும்போது நீல நிற வெல்டிங் ஜ்வாலை சிவப்பா இருக்கிற இரும்பைவிட சூடானது.

நம்ம சமையலறையில நீல நிற காஸ் ஸ்டவ் மெலே சுக்கா ரொட்டி செய்ய/ அப்பளம் சுட போடுகிற வலை சிவப்பா ஆனாலும் நீல காஸ் அதிக வெப்பம் உடையதுதானே?

# படங்கள்1,2,3: ராமலக்ஷ்மி

தப்புன்னு தோணினாலும், கூட்டிக்கழிச்சு பார்க்க சிவப்பு அதிகம் இருக்கிற படம் வார்ம். நீலம் அதிகம் இருக்கிற படம் கூல்! அப்படித்தான் மனசு பழகி இருக்கு!

5,500 K என்கிறது பகல் வெளிச்சம் - டே லைட். இது தவிர இன்னும் ரெண்டு ஸ்டான்டர்ட் இருக்கு . டங்க்ஸ்டன் 3200 K, 3400 K . இது ரெண்டும் கிட்ட கிட்ட இருக்கறதால் பெரிய வித்தியாசம் இல்லை. இந்த அளவெல்லாம் பில்ம் பயன்படுத்தினா கலர் பாலன்ஸ் பண்ண பில்ம் ஆ வாங்க பயன்பட்டது.

இப்ப டிஜிட்டல் படங்களை போஸ்ட் ப்ராசஸிங் ல இதை எல்லாம் கண்ட படிக்கு மாத்தமுடியுது! அதனால இந்த 5.500 க்கு மேல் வெப்பமோ 3,200 க்கு கீழ் வெப்பமோ உள்ள எந்த சூழ்நிலையிலும் படம் எடுக்க முடியுது.

உச்சிவெயிலில் எடுக்கப்பட்ட இப்படங்கள் அத்தனையிலும் கூல் கூல் நீலம் விளையாடுவதைக் காணலாம்.

# படம் 4: ஜேம்ஸ் வஸந்த்

(இன்னும் தெரிந்து கொள்வோம்)

பாகம் I இங்கே.

-திவா
‘சித்திரம் பேசுதடி’
http://chitirampesuthati.blogspot.com/

`புகைப்படங்களில் நேர்த்தி`.. பாகம் - 1

2011-07-25T07:32:00.001+05:30

வணக்கம் நண்பர்களே....

நீண்ட இடைவெளிக்கு பிறகு `புகைப்படங்களில் நேர்த்தி` என்கிற புதிய தலைப்பின் வழியாக உங்களை சந்திப்பதில், பகிர்ந்து கொள்வதில் மகிழ்ச்சியடைகின்றேன்...

இன்றைக்கு கிட்டதட்ட அனைவரிடத்திலும் ஏதோ ஒரு வடிவில் கேமரா என்பது நம்மிடம் இருப்பது உறுதி..

ஒரு சிலர் , முதன் முதலில் வாங்குகின்றோம் , நல்லதாக வாங்கிவிடலாம் என்று தனக்கு சம்பந்தமில்லாத , தேவையில்லாத விலை அதிகமான கேமராக்களை ஆர்வத்தில் வாங்கிவிடுவார்கள்..ஆனால் அவர்களுக்கு நன்றாக படம் எடுக்க தெரியாது...

சரி நமக்கு அவ்வளவு தான் தெரியும் என்று படம் எடுக்க விருப்பப்படமாட்டார்கள்.. அவ்வளவு தான், கேமரா சும்மா வீட்டில் தூங்கிக்கொண்டிருக்கும்..

அதே சமயம் விலை குறைவான கேமராக்களை வைத்திருப்பவர்கள், தான் தவறாக எடுத்த படங்களை பார்த்து, இந்த கேமராவில் இவ்வளவு தான் எடுக்க முடியும் என்று தாழ்வு மனப்பான்மையுடன் மேலும் படம் எடுக்க ஆர்வம் காட்ட மாட்டார்கள்...

ஆனால் நல்ல படம் என்பது கண்டிப்பாக விலை அதிகமான கேமராவை வாங்குவதில் மட்டும் இல்லை என்பதை கீழே உள்ள படங்களை பார்த்தால் புரியும்..

இந்த படங்கள் 9000 ரூபாய் சிறிய கேமராவில் தான் எடுத்தது...

எனவே நல்ல படம் என்பது கேமராவில் மட்டுமல்ல ,எடுப்பவரின் கையிலும் உள்ளது..

2 லட்ச ரூபாய் கேமராவில் கொஞ்சம் தவறாக எடுக்கும் படத்தை விட 2 ஆயிரம் ரூபாய் கேமராவில் சரியாக எடுக்கப்படும் படம் சிறந்ததாக தான் இருக்கும்.. இதற்கு உதாரணங்கள் கீழே உள்ள படங்கள்.

இந்த படம் -1 40000 ரூபாய் கேமரா மற்றும் 40000 ரூபாய் லென்ஸில் எடுக்கப்பட்டது... இந்த படம் சற்று blur ஆக எடுக்கபட்டுள்ளதை இந்த சிறுவனின் முகத்தில் தெரியும்.. படத்தை க்ளிக் செய்து பெரிதாக பார்க்கவும்..

(படம்-1)

ஆனால் அதே சிறுவன்,அதே இடத்தில், அதே நேரத்தில் 9000 ரூபாய் சிறிய கேமராவில் சரியாக(என்னால் முடிந்த அளவு) எடுக்கப்பட்டுள்ளதை இந்த படத்தை(படம்-2) பார்த்தால் புரியும்

(படம்-2)

ஒரு சில நேரங்களில் சின்ன sensor கேமராக்கள் தரும் சில சிறப்பம்சங்கள் (அதிக depth of field, macro close focusing etc.) பெரிய கேமராவில் கிடைக்காது என்பதை கீழே உள்ள படங்களை பார்த்தால் புரியும்...

இந்த படம் (படம்-3) 9000 ரூபாய் சிறிய கேமராவில் எடுத்தது.. இந்த தும்பியின் உடல் முழுவதும் டீடெய்ல்ஸ் இருக்கும்... இதன் காரணம் சிறிய கேமராவில் இருக்கும் அதிக depth of field ஆகும்.. இதை பற்றி பின் வரும் தொடர்களில் பார்க்கலாம்..

(படம் - 3 )

இந்த (படம் -4) 40,000 ரூபாய் கேமரா மற்றும் 40,000 ரூபாய் லென்ஸில் எடுக்கப்பட்டது... இவ்வளவு விலை இருந்தாலும் தும்பி பூச்சியின் தலையில் மட்டும் தான் டீடெயில்ஸ் இருக்கின்றது...

(படம் - 4)

அதற்காக பெரிய கேமராக்கள் தேவையில்லை என்று அர்த்தமில்லை.. நாம் நன்றாக எடுத்தால் சிறிய கேமராக்களும் நன்றாக படம் எடுக்கும்...

புதிதாக கேமரா வாங்குபவர்கள் கேமராவில் மலை போல் இருக்கும் settings ஐ பார்த்து பயந்து போய் இதெல்லாம் நமக்கு சரிபட்டு வராது என்று சிம்பிளாக auto mode ல் போட்டு படமெத்துக்கொண்டு திருப்திப்பட்டுக்கொள்வார்கள்..

ஒரு சிலர் பெரிய zoom கேமரா/ லென்ஸ் வைத்துக்கொண்டு zoom பட்டனைக்கூட சரியாக பயன்படுத்தாமல் wide angleலேயே படமெடுப்பார்கள்.. இதனால் அந்த மாதிரி கேமராக்களை வாங்குதில் அர்த்தமில்லாமல் போய் விடுகின்றது..

இந்த மாதிரி எல்லாம் தவறுதலாக படம் எடுக்கும் போது நாம் புதுமையாக படம் எடுக்கவோ, கற்றுக்கொள்ளவோ வழியில்லை என்று சொல்லலாம்..

இப்படி பல குறைகள் தீர இத்தொடர் உதவும் என்று நம்புகின்றேன்..

ஒரு நல்ல படம் அமைய வேண்டுமென்றால், முக்கியமாக கவனிக்கவேண்டியது என்று மூன்று விதமாக பிரித்துக்கொள்ளலாம்..

1. படம் எடுப்பதற்கு முன்

கேமராவை எப்படி செட்டிங்ஸ் செய்வது , அதாவது exposure , ISO , white balance , aperture , shutter speed zoom எப்படி பயன்படுத்துவது,கேமராவை எப்படி கையாள்வது என்பதை பற்றி பார்க்கலாம்..

2. படம் எடுக்கும் போது

சரியாக ஃபோகஸ் செய்வது எப்படி , back ground எப்படி , focal length பயன்படுத்துவது , blur இல்லாமல் எடுப்பது, கம்போஸிசன் போன்றவற்றை பற்றி பார்க்கலாம்..

3. படம் எடுத்த பின்

இன்றைய டிஜிட்டல் கேமரா உலகில் படம் எடுக்கும் போது எவ்வளவு முக்கியமாக கவனிக்க வேண்டுமோ ,அதே அளவுக்கு post processing(குறைந்தபட்சம்) என்பதும் முக்கியமே..

இதில் முக்கியமான எளிதான cropping , contrast , sharpening ஆகியவற்றின் முக்கியதுவம் பற்றியது..

முதலில், படம் எடுப்பதற்கு முன் கவனிக்கவேண்டியதை அடுத்து பகுதியில் இருந்து பார்ப்போம்...

-கருவாயன்

ஜுலை 2011 போட்டி முடிவுகள் (படத்திற்குள் படம் பிடித்தல்)

2011-07-24T19:04:00.000+05:30

அன்பான வணக்கங்கள்,

முதல் சுற்றில் வெற்றி பெற்ற டாப் 10 படங்களைப் பாத்திருப்பீங்க. போட்டியிட்டு முதல் சுற்றில் வெளியேறிய படங்களையும் அதற்காக காரணங்களையும் போட்டி ஆல்பத்திலேயே சுருக்கமாகத் தெரிவித்திருந்தேன். அத்தோடு, ஒரு படம் தெரிவு செய்யப்பட என்னன்னவெல்லாம் கருத்திற்கொள்ளப்படும் என்ற கேள்விக்கான எனது சிறு விளக்கம் உங்களுக்குப் புரிந்திருக்குமென நம்புகிறேன். உங்களுக்கு ஞாபகமூட்ட இதோ மீண்டும் அந்தப்பட்டியல்...

படம் தலைப்புக்கு (மிக) பொருத்தமாகவும் விளங்கிக் கொள்ளத்தக்கதாகவும் இருத்தல் வேண்டும்
பார்ப்பவரை இயல்பாகவே ஈர்க்க வேண்டும்
விபரமாகவும் (details) தெளிவாகவும் (clarity) இருத்தல் வேண்டும்
அடிப்படை விதிகள் (eg: composition, rule of thirds) கருத்தில் கொள்ளப்பட வேண்டும்
பிரதான கருப்பொருளிலிருந்து கவனத்தை திசை திருப்பும் விடயங்கள் இருக்கக்கூடாது
சிறப்பாக ஒளியும் நிழலும் பயன்படுத்தப்பட்டிருக்க வேண்டும்

முதல் மூன்று இடங்களை பிடித்தவர்கள் யார் என்று பார்ப்பதற்கு முன், இறுதி சுற்றில் வெளியேறிய படங்களை பற்றி பார்ப்போம்.(எழுமாற்றாக வரிசைப்படுத்தப்பட்டுள்ளன)

# Karthi (நாய்,சாலையோர பூக்கள்)

வர்ணங்கள் அடுக்கடுக்காகத் தெரிவது, அழகாக வீழ்ந்து கிடக்கும் பூக்கள், தெளிவு என்பன சிறப்பான விடயங்கள். ஆனால் நாய் முழுமையாக தெரியாமல் இருப்பது (வாலின் மீதி தெரியாமல் இருப்பது) பெரிய பலவீனம்.

# KVR (ஜீன்ஸ், பெல்ட்)

வித்தியாசமாக ஓர் விளம்பரம் போல இருப்பது சிறப்பு. ஆனால் அதிகமான

Post Processing இடம்பிடித்திருப்பது பெரிய குறைபாடு. அதைத்தவிர இயல்பான கவனயீர்ப்பு குறைவாகவுள்ளது.

# பிரேம்நாத் (கடிகாரம்)

மேலேயுள்ள படம் போன்று வித்தியாசமாக ஓர் விளம்பரம் போல இருப்பது சிறப்பு. ஆனால் அதிகமான Post Processing இடம் பிடித்திருப்பது பெரிய குறைபாடு. அதைத்தவிர இயல்பான கவனயீர்ப்பு குறைவாகவுள்ளது.

# James Vasanth (கட்டிடம்)

அழகான கட்டடத்தை அழகாகப் படம் பிடித்துள்ளீர்கள். நிழல் வீழ்ந்துள்ள கருப்பு பகுதிகள் படத்தின் அழகைக் கெடுக்கின்றன. அதைத் தவிர Post Processing படத்தை செயற்கைத் தன்மையாக்கிவிட்டது.

# Sathiya (வீதி)

அழகான படம். பிரதான கருப்பெருளாகிய வீதியைப் பார்க்கும் கண்கள் சிவப்பு வண்டியில் பதிவது தவிர்க்க முடியாதிருப்பது பலவீனம். Leading lines leads to red car. மற்றும் படத்தின் மேலேயுள்ள வானம் வெளிறித் தெரிவதைத் தவிர்த்து Crop செய்திருக்கலாம்.

# Siddhadreams (இளைஞன், செருப்பு & ஜீன்ஸ்)

தெளிவு, DoF, கருப்பொருளை கையாண்டவிதம் என்பன சிறப்பு. படத்தில் ஆங்காங்கே Over Exposure இருப்பது பலவீனம். படத்தின் கீழ் பகுதி, இடப்பக்க மூலையிலுள்ள தரையின் தோற்றப்பாடும் அழகாக அமையவில்லை.

சிறப்புக் கவனம்

# Gowri (young girl)

அழகை அழகாகப் படம் பிடித்துள்ளீர்கள். ஆனால் கண்கள் மறைவாக இருப்பது குறைபாடாகவுள்ளது. மற்றும், பின்னேயுள்ள மரம் பின்னணியைச் சற்று குழப்புகிறது.

மூன்றாம் இடம்!

# Narayanan (வீதி)

'இந்த வீதியிலே வண்டியோட்டிப் போன எப்டியிருக்கும்' என்ற உணர்வை ஏற்படுத்துகிறது இந்தப்படம். வெறுமையான வீதி வளைந்து செல்வது அழகு. வெளிறிய வானம் சற்று Over Exposure ஆகி இந்தப்படத்தை பின்னுக்குத் தள்ளிவிட்டது.

இரண்டாம் இடம்!!

#நித்தி க்ளிக்ஸ் (பெரியவர்)

அருமையான படம். வயோதிபத்தை அருமையாகக் கோடிட்டுக் காட்டுகிறது. ஆனால் தலையிலும் தோளிலும் உள்ள Over Exposure படத்தை 2ம் இடத்திற்கு தள்ளிவிட்டது.

முதலிடம்!!!

# Mervinanto ( செல்லப் பிராணி )

இந்தப்படத்தில் இருப்பது உண்மையான பூனையா அல்லது படமா என எனக்கு சந்தேகம் வந்தது. அது படமாக இருந்தாலும் எனக்கு ஆட்சேபனையில்லை. படத்தை உயிருள்ள பூனையான காட்டியிருந்தால் அது ஃபோட்டோகிராபரின் திறமையே! செல்லப் பிராணியாகிய கருப்பொருள் குவளையில் மீண்டும் பதிவாகி 'படத்திற்குள் படம் பிடித்தல்' என்ற தலைப்பிற்கு வேறு ஒரு வழியிலும் பொருத்தமாகிறது! வாழ்த்துக்கள் மேர்வின்!

அடுத்த மாத போட்டிக்குத் தயாராகுங்கள்...! தொடர்ந்து பங்கு பற்றுங்கள்...!

***